Озал-ондакка таваржыр часкан

Орук-транспорт комплекизиниң яамызындан медээ езугаар алырга, июль 30-де эртен 9-10 шак үезинде Кызыл хоорайның аэропортундан «Ан-2» самолет Yш-Белдир аржаанынче пассажирлерлиг ужуп үнген, шимчедикчизинде дааш дыңналып кээрге, самоледун дүрген хондурар ужурга таварышканын экипаж диспетчерлерге дыңнаткан.
«Кызыл» аэропорттуң өрт-камгалал албаны шалыпкын хөделип, өрт өжүреринге болгаш камгалал ажылдарын чорударынга белен турган. Самолетту экипаж озал-ондак чокка аэропортка хондурган, пассажирлер болгаш экипажтың аразындан кемдээн-кергээн кижи чок болган.

Республиканың орук-транспорт комплекизиниң сайыды Олег Косоротовтуң медеглээни-биле алырга, Красноярскиден удавас тускай комиссия келгеш, самолеттуң шимчедикчизинде үрелиишкинниң чылдагаанын тодарадыр. Экипажтың болгаш ооң командириниң билдилиг болгаш дүрген хөделиишкиннериниң ачызында озал-ондак болбаан.

Озал-ондакка таваржыр часкан самолет — республиканың девискээринге агаар-биле пассажирлер аргыштырып, чүък сөөртүп турар «АэроГео» кызыгаарлаан харыысалгалыг ниитилелдиң эт-хөреңгизи.