Тываның Баштыңының албан-хүлээлгезин күүседип турар Владислав Ховалыг Кочетов суурга ажыл-албан аайы-биле четкен

 Тываның Баштыңының албан-хүлээлгезин түр када күүседип турар В. Ховалыг төөгүлүг суурдан  Тыва Арат Республиканың тургустунганындан бээр 100 чылдаан оюн байырлаар хүнге чедир 100 хонуктуң  стартын берген. 

 Регионнуң удуртукчузу Кочетов суурнуң чоогунда сүт-бараан фермазын катап тургузар дээн төлевилелди деткээн. “Демниг” көдээ ажыл-агый кооперативиниң удуртукчузу Аяс Чульдум эрткен чылын саналды киирген. Көдээ ажыл-агый яамызындан төлээлери-биле өске регионнарның арга-дуржулгазын өөренип, уксаажыдылга заводтарынга четкен. 

 Бо хүнде октаттынган объектини долгандыр херимнеп, тудуг материалдарын чедирип, техниканы эккеп алган. Часкы хову ажылдарынга база белеткелди эгелээн. Сүткүр уксааның 100 баш бода малын өстүрер планны салган. Бир хүнде 20-25 литр сүттү бир баштан саап болур деп санап турарлар. Бир эвес ол ынчаар бүде бээр болза, чүгле Кочетов суурнуң чурттакчыларын база социал объектилерин эвес, а бай-хаакчыларны база сүт-биле хандырып, артыкшылдыын рынокка садып болур. Кочетов суурнуң чурттакчыларынга 17 ажылчын олутту ферма хандырар. Төлевилелдиң эгелекчилери бо чылдың августа сүт-бараан фермазын ажылдадып, а сентябрь-октябрьда продукциязын болбаазырадып эгелей бээр планныг. 

 Тываның Баштыңының албан-хүлээлгезин түр када күүседип турар В. Ховалыг уруглар садтарының, эмнелгелерниң, чурттакчы чоннуң сүтке хереглелин санап көөрүн, алызы барып тус черниң чурттакчыларындан сүт хүлээп алыр черни ажыдырын сүмелээн. 

 ТР-ниң Баштыңының оралакчызының албан-хүлээлгезин күүседип турар Валентин Енданга, көдээ ажыл-агый база аъш-чем сайыдының албан-хүлээлгезин күүседип турар Айдың Дунга кандыг деткимче көргүзүп болурун өөренип көөр даалганы берген. Араттар өг-бүле фермер ажыл-агыйын деткиир программага киржир дээш документилерин киирген, тускай техниканы лизинг-биле – күрүнеден 60 хуу база боттарындан 40 хуу кады акшаландырыышкын-биле садып ап болур. 

 Кызылдан  делегация ол чорааш, орук ара, Кочетов суурда Тыва Республиканың Национал музейиниң 1969 чылда тургустунган салбырынга четкен. 1921 чылдың август айда, Суг-Бажы деп черге, Тыва Арат Республика тургустунганын чарлаан Бүгү-Тываның Тургузукчу хуралы болуп эрткен. 

 Тываның Баштыңының албан-хүлээлгезин түр када күүседип турар Владислав Ховалыг кел чыдар юбилей база ТР-ниң Үндезин Хоойлузунуң хүнү-биле тыва күрүнениң үндезилеттинген кавайындан байырны чедирген. 

 Таңды кожуун чагырга даргазы Алик Монгуш төөгүлүг болуушкунга тураскаадып Тываның бирги Үндезин хоойлузу биле Тугунуң хоолгаларын белекке сунган. Кожууннуң арга-арыг ажыл-агыйының удуртукчузу Ирина Козлова Тываның удуртукчузун ыяш олуртур чараш езулалче чалаан. Владислав Ховалыг хады өзүмүн тарып олурткан.