01.05.2021
Россия Федерациязының болгаш Тыва Республиканың күрүне шаңналдарын тыпсыр байырлыг ёзулал Чазак Бажыңынга болуп эрткен. Тываның Баштыңының хүлээлгезин түр када күүседип турар Владислав Ховалыг болгаш Дээди Хуралдың даргазы Каң-оол Даваа аңгы-аңгы адырларның 19 мурнакчыларынга база хоочуннарынга шаңнал-макталды тывыскан.
“Частың болгаш күш-ажылдың хүнү-биле бүгү сагыш-сеткилимден байырны чедирерин чөпшээреп көрүңер! Чуртувустуң күш-ажылчы кол байырлалы – Май 1-ниң хүнү-биле! Шынчы, ак сеткилдиг күш-ажыл чок болза, бурунгаар шимчээшкин болдунмас. Кижи бүрүзү боттарының ада-иезиниң күш-ажылын уламчылаарын кызыдып, боттарының төрээн болгаш чоок кижилеринге төлептиг чуртталганы хандырып, төрээн суурунуң, хоорайының, республиказының, Россияның күчү-күжүнүң байлаан болгаш ат-алдарын улгаттырар ужурлуг. Бөгүн мээң мурнумда бедик профессионал чедиишкиннерлиг, боттарының кызымак күш-ажылы-биле шылгараан бистиң чаңгыс чер-чурттугларывыска күрүне шаңналдарын тыпсыр хүндүлүг болгаш харыысалгалыг хүлээлге тургустунуп келген” - деп Владислав Ховалыг чугаалаан.
Эмчи ажылдакчылары – №1 Республика эмнелгезиниң реанимация болгаш интенсивтиг терапия салбырының анестезиолог-реаниматолог эмчизи Атланта Сулдемге, Халдавырлыг аарыглар эмнелгезиниң бактериологтуг лабораториязының улуг фельдшери Аржана Чулдумге Россия Федерациязының Президентизиниң өөрүп четтириишкиннерин тывыскан.
Республиканың СПИД болгаш халдавырлыг аарыгларга удур демисел болгаш ону болдурбас талазы-биле төптүң эмнээшкин талазы-биле кол эмчиниң оралакчызы Янжмаа Донгакты, Халдавырлыг аарыглар эмнелгезиниң ижинниң халдавырлыг аарыглар салбырының (№3 салбыры) эргелекчизи Оюма Кууларны, Мөңгүн-Тайга кожууннуң төп эмнелгезиниң акушер болгаш гинекология салбырының акушери Ария Салчакты Россия Федерациязының Хүндүлел бижии-биле шаңнаан.
«Россия Федерациязының алдарлыг шахтёру» деп атка «Межегейуголь» хөмүр-даш компаниязының кол маркшейдери Марина Сердюк төлептиг болган.
Чеди-Хөл кожууннуң Ак-Тал сумузунда тараачын ажыл-агыйның баштыңы Вячеслав Маскырны, өрт камгалалының хоочуну, ТР-ниң ИХЯ-да Кадык камгалал федералдыг казна эргелелиниң эмнелге-санитар кезээниң шериг-эмнелге комиссиязының эмчи бүрүткекчизи Эльвира Корнякованы Тыва Республиканың Баштыңының Хүндүлел бижии-биле шаңнаан.
«Тыва Республиканың алдарлыг ажылдакчызы» хүндүлүг атты дааразында мурнакчыларга:
«Чурук» мастерскаяның национал эт-сеп талазы-биле дизайнери, «XX чүс чылдың Тываның алдарлыг кижилери» күрүне номунуң, «Урянхай», «Тыва» сектүүллдерниң чуруктар болгаш чурук каасталгазының автору, «Россия-биле кады», «Сактыышкын ному» номнарның II томунуң, “Тываның 9 үнелиг эртинелери” чурук альбомунуң автору болгаш чурук каастакчызы Василий Бальчый-оолга;
«Тыва авиация шугуму» авиакомпанияның ужудуушкун ажылдарын организастаар талазы-биле директорнуң оралакчызы Евгений Харинге;
Мөңгүн-Тайга кожууннуң «Мөген-Бүрен» КУБ-туң склад эргелекчизи Мария Хертекке тывыскан.
«Тыва Республиканың алдарлыг чылгызы» хүндүлүг атка Чөөн-Хемчик кожууннуң Чадаана хоорайда хууда дузалал ажыл-агыйының баштыңы Вячеслав Ооржак төлептиг болган.
«Тыва Республиканың алдарлыг малчыны» хүндүлүг атка Өвүр кожууннуң Дус-Даг суурда тараачын ажыл-агыйының баштыңы, муңчу малчын Чимит Куулар төлептиг болган.
«Тыва Республиканың алдарлыг эртем ажылдакчызы» хүндүлүг атка Тываның эртем төвүнүң директору, биология эртемнериниң доктору Чойган Самбыла төлептиг болган.
«Тыва Республиканың көдээ ажыл-агыйының алдарлыг ажылдакчызы» хүндүлүг атка Таңды кожууннуң Межегей суурда тараачын ажыл-агыйының баштыңы Геннадий Монгуш төлептиг болган.
«Тыва Республиканың кадык камгалалының алдарлыг ажылдакчызы» хүндүлүг атка Кызыл хоорай поликлиниказының кол эмчизи, Тыва Республиканың Дээди Хуралының (парламентизиниң) 3-кү чыыжының депутады Долаан Калбак төлептиг болган.
Тыва Республиканың «Шылгараңгай күш-ажылы дээш» медальды - Кызыл хоорайның Хоочуннар эвилелиниң «Хөгжүмчү» бөлүүнүң удуртукчузу Валентина Ондарга; «ЧЭК 4» башкарыкчы компанияның Шагаан-Арыг участогунуң 5 разрядының токары Виктор Намзынга тывыскан.
Тыва Республиканың Дээди Хуралының (парламентизиниң) конститусчу-эрге-хоойлу политиказы болгаш күрүне тудуунуң талазы-биле комитеттиң даргазы Виктор Глуховка «Буян-Бадыргы» ордениниң III чадазын тывыскан.
«Бистиң мурнувуста чүткүдер чаа сорулгаларывыс, бедиктеривис бар. Россия Федерациязының Чазаа эрткен чылдың апрельде бистиң республиканың 2024 чылга чедир социал-экономиктиг сайзыралының тускай программазын бадылаан. Чурттуң удуртулгазының ону хүлээп алганы - Тывага болгаш ооң хөй нациялыг чонунга онзагай кичээнгейиниң херечизи. Ол бүзүрелди улуг программаның боттандырылгазының чедиишкиннери-биле шынзыдары - бистиң ниити хүлээлгевис болур. ТАР-ның тургустунганындан бээр 100 чыл оюн байырлаар чылдың кол болуушкунунга белеткеливис база Улусчу эгелээшкиннерниң чылы аңаа улуг дөгүмнү бээр. Майның 1-биле, Частың болгаш күш-ажылдың хүнү-биле, чаңгыс чер-чурттугларым!» - деп, Владислав Ховалыг дооскан.