Тыва Республиканың “Мээң бизнезим” төп чурттуң шылгараңгай 10 төптериниң санынче кирген

Россияның Экономиктиг хөгжүлде яамызының үнелээни-биле, чурттуң 27 регионнарының аразында “В” бөлүкте “Тыва Республиканың мээң бизнезим” төвү “Үре-түңнел” угланыышкында 4-кү, “Кризиске удур чедимчелиг деткимче” угланыышкында 7-ги, “Сайгарлыкчы чорукту деткиириниң эң эки төвү” угланыышкында 4-кү, “Кластерлиг хөгжүлдениң дээштиг төвү” угланыышкында 6-гы черлерни төлептии-биле ээлээн.

Россияның 27 регионнары кирген «В» бөлүкте шупту организациялар аразында Тыва Республиканың Магадылал фондузу 2020 чылда ажыл-чорудулгазының түңнели-биле эки көргүзүгнү чедип алган. Ниити рейтингиде Тыва Республиканың “Мээң бизнезим” төп бодунуң бөлүүнде 5-ки турушту ээлээнин республиканың Экономика яамызы дыңнаткан.

Россияның 84 регионнарын 1000 чурттакчыга онааштыр биче болгаш ортумак бизнестиң субъектилериниң санын көрүп, үш аңгы бөлүктээн рейтингиге “Мой бизнес” төптер киришкен. Рейтингини түңнээрде 12 угланыышкынны тускайлап, тус-тузунда тиилекчилерни илереткен.

 Россияның Президентизиниң айыткан кол сорулгаларын чедип алыр аргаларының бирээзи - "Мой бизнес" төптер аразында рейтинг болур. Ылаңгыя, экономиктиг турум өзүлдени чедип алырынга база биче болгаш ортумак бизнес субъектилериниң санын көвүдедиринге ол идигни бээр. Рейтингиниң механизмин ам-даа сайзыраңгайжыдар, ынчангаш ону түңнээриниң арга-хевирлери ажык-чарлыг болгаш киржикчилерге билдингир болур ужурлуг” - деп, Максим Решетников Калининградка эрткен конференцияда демдеглээн. 

Тыва Республиканың делегациязын «Мой бизнес» төптүң удуртукчузу Азияна Пирлей база «Тыва Республиканың Бизнес-инкубатору» ККА-ның удуртукчузу Аян Серен-Доржу төлээлээн. 

«Сайгарлыкчы чорукту деткээн бистиң инфраструктуравыс ниити национал рейтингиде элээн каш угланыышкыннарда тергиидекчи туруштарны ээлээни эки. Эки түңнелдерни чедип алыр дээш ,оон-даа идепкейлиг база соруктуг ажылды уламчылаар бис” – деп, Тываның Экономика яамызы дыңнаткан.