Ак-Суг чыдынын шиңгээдир төлевилелдиң күүселдезин чугаалашкан

 «Интергео башкарыкчы компания» КХН-ниң иштинде “Голевтиң даг-руда компаниязы” КХН бүдүрүлге Россияда эң улуг чес чыдыны болур Ак-Суг деп черге даг-болбаазырадылга комбинадын тудар. Ынаар ниитизи-биле 140 млрд. рубль ажыг инвестицияны киириштирер. Чылда 24 млн тонна руданы казып тыпкаш, болбаазырадыр планныг. Комбинат 2025 чылда долу күжү-биле ажылдап эгелээри көрдүнген.

 Туран хоорайдан Ак-Сугнуң комбинадынга чедир 320 км автомобиль оруун база 220 кВ күчүлүг “Тулун – Туманная” электри хандырылгазының шугумун тудар айтырыгларны ажыл-агыйжы ужуражылгада чугаалашкан. 371 километрде шөйлү бээр электри шугуму Иркутск облазы биле Тываның эвээш чурттакчылыг черлерин таварып эртер. «Туманная» подстанциядан чоруткан чырык хандырылгазының четкизинге Тожу кожууннуң чурттакчылыг суурларын кожуп, регионнуң энергетика хандырылгазын экижидер арга тургустунар. 

Кызыл хоорайга Даг техникумун тудуп, кадрлар белеткелиниң айтырыын шиитпирлээр. 2020 чылдың октябрьда Тыва Республиканың Чазаа биле “Голевтиң ДРК” КХН-ниң аразында чарган "2020-2025 чылдарда Тыва Республиканың социал-экономиктиг хөгжүлдези дээш кады ажылдаарының дугайында" Дугуржулгада ол пункт кирген. Даг-болбаазырадылга комбинадын туткаш, ажыглалче киириптерге, 2000 хире ажылчын олуттар тургустунар, оларның 800-инге тускай мергежилдиг база 400-үнге тускай дээди мергежилдиг специалистер ажылдаар. Немелде инфраструктура адырларынга ажылчын олуттар тургустунар. Төлевилел боттаныышкынының үезинде регионнуң каттышкан продуктузунче киирген үлүг 1,4 трлн. рубльга деңнежир, а бюджетче - 200 ажыг млрд. руб. 

РФ-тиң Президентизи В.В. Путинниң апрель 21-де Москвага Айыткалынга даянып, төлевилел боттаныышкынының айтырыгларын чугаалажып көргенин Василий Кузичев демдеглээн. “Тожуда Ак-Сугнуң чес-профир чыдынынга даг-болбаазырадылга комбинадын тудары - Тыва Республиканың социал-экономиктиг хөгжүлдезиниң бот-тускайлаң программазында эң улуг төлевилел болур. «Ак-Суг» төлевилелдиң амгы айтырыгларын шиитпирлээри-биле доктаамал ужуражып турар кылдыр дугуруштувус” – деп, Тываның Баштыңының албан-хүлээлгезин күүседип турар Владислав Ховалыг чугаалаан.