Часкы хову ажылдары доктааттынган агротехниктиг үеде эгелээр

Агаар-бойлусту көрүп тургаш, агротехниктиг хуусаа езугаар, майның 1-ден июнь 10-га чедир тараа болгаш мал чиир культураларны тарыыр болза, майның 10-дан июнь 25-ке чедир картофельди база ногаа культураларын тарыыр. Республиканың социал-экономиктиг хөгжүлдезиниң баш бурунгаар медээзи езугаар, 2021 чылда 15,0 муң тонна тарааны; 26,0 муң тонна картофельди, 3,3 муң тонна ногааны бүдүрери көрдүнген. 7,7 муң тонна тараа болгаш мал чиир культуралар үрезини херек бооп турар.

 Санниковтуң ТАА-биле республиканың 20 ажыл-агыйлары 10,7 млн. рубльге 772 тонна үрезин салып алыр керээни апрельдиң 17-де чарган. 7,0 млн рубльга 469 тонна кызыл-тасты, 3,64 млн. рубльга 303 тонна сула үрезинин алырлар. Ажыл-агыйларда 5,2 муң тонна картофель үрезини бар, хереглелдиң 80%. 

«Социал картофель» төлевилелди боттандырарынга 1,03 млн рубль түңге 44 тонна картофель үрезинин садып алыр керээ чардынган. Картофель үрезинин эвээш орулгалыг 1421 өг-бүлеге үлээр, бо чылдың апрель 19-тан эгелеп кожууннарже график езугаар үрезинни чедирип эгелээн. Огород ажыл-агыйын хөгжүдер дээш, чонга “борщ түү” деп адаар ногаалар үрезинин үлеп эгелээн. 

ТР-ниң Күш-ажыл болгаш социал политика яамызы республиканың кожууннарында 73843 өрегелер барын, 52910 өреге ногааларны доктаамал тарып турарын дыңнаткан. 21 муң хире өг-бүле эвээш орулгалыг бөлүкке санадыр. Ол өг-бүлелерни “борщ түүнүң” үрезиннери-биле хандырар. ТР-ниң Күш-ажыл болгаш социал политика яамызы “Борщ түү” акцияга киржиринче спонсорларны, хөй-ниити организацияларын болгаш херээженнер эвилелдерин чалаан.

 Республиканың ажыл-агыйлары 11,06 млн. рубль акшага 451 тонна чемишчидилгени садып алыр керээлерни чарган. Хакас Республикадан «Содействие Агро» КХН, «Хакагроторг» КХН минералдыг чемишчидилгени хандырар. Бо хүнде Каа-Хем биле Таңды кожууннарның ажыл-агыйларынче 39 тонна чедишчидилгени сөөртүп чедирген. 

Оон аңгыда суггат системаларын белеткеп эгелээн. Хемнер уннарын база арыктарны дуй чыдыпкан будук-сигенден арыглаашкынны чорудуп турар. Ниитизи-биле 67 км арыктарны база бугаларны аштаан. 14 кожуун чагыргалары кара довуракты база өдекти сөөртүп эгелээн. 200 тонна хөрзүннү, 98,5 тонна өдекти төккен. 

Танды кожуунда А. Боровиков 100 га черни тарылгага белеткеп эгелээн.