Чурттуң Президентизиниң Айыткалы: деткимчениң чаа хемчеглери база экономиктиг хөгжүлдеге чогуур байдалдарны тургузары

Чурттуң Президентизи бир дугаарында кадык камгалалы, социал политика, экономика дээн ышкаш иштики айтырыгларны база айыыл чок чорук база даштыкы политиканы Айыткалында демдеглээн. 

В.В. Путин Россияны хөгжүдеринге технологтуг болгаш социал-экономиктиг сорулгаларны база айыткан. Айыткалды эпидемиологтуг мындыг байдалда бир дугаар берип турар болгаш, коронавирус пандемиязы-биле холбашкан айтырыгларга база доктааган. Күрүне баштыңы байдалды кичээнгейге алырын регионнар удуртукчуларындан дилеп, чурттакчы чондан боттарының база чоок кижилериниң кадыкшылын камнаарын кыйгырган. Путин вакцинацияның дээштиин айтып, шупту тарылганы салдырып алырын сагындырган. 

Ол ышкаш диспансеризация биле профшинчилгелер программазын калбартып, июлдуң 1-ден ынаар шупту хамаатыларны хаара тударын онааган. Хемчеглерни үе шаанда чорудуп тургаш, чоннуң билиишкинниг хөделиишкини-биле халдавырның дүрген нептерээрин доктаадып болур деп, чурттуң лидери чугаалаан. Чурттуң Баштыңы бичии уругларның кадыкшылы эң кол угланыышкын болурун айтып, чайгы дыштанылга лагерьлеринге дыштанган путевкалар өртээниң чартыын эгидер программаны ажылдадырын айыткан. «Турисчи кешбэк» программаны ам-даа уламчылаарын кыйгырган. 

Ядыы-түреңги чорукту ажып эртер дээш, российжилерниң боттуг орулгаларын көвүдедири-биле, чурттакчы чонга, бир дугаарында ажы-төлдүг өг-бүлелерге чаа деткимче хемчеглерин көргүзер даалганы президент берген. Орулгазы эвээш өг-бүлелерге пособиелерни төлээр. В. Путин амыдырал байдалы бергедээшкинниг, иштиг херээженнерге ай санында 6350 рубльди төлээрин саналдаан, ол ышкаш долу эвес өг-бүлелерде сестен 16 хар чедир назылыг ургуларга июльдуң 1-ден эгелеп ортумаа-биле 5650 рубльди ай санында бээр даалганы берген. Бо чылын школа кирер бирги классчыларга база өөреникчилерге он муң рубль хемчээлдиг чаңгыс катап бээр төлевирни август 1-ге чедир төлээр. 

Чурттуң удуртукчузу Федералдыг Хуралга Айыткалында поликлиникаларже, тускай специалистерже шинчилге эртер, рецепт алыр дээш оочурларны чок кылырын дааскан. Кадык камгалалының бүгү системазын технологтуг чаа баазага эде тургузуп, эмчи дузазының бирги звенозунда хүн бүрүнүң чидиг айтырыгларынче кичээнгейни салырын демдеглээн. 

В.В.Путин чурттуң хөгжүлдезинге эртемниң чугула ролюн демдеглеп, российжи эртемденнерниң аныяк салгалы чаа төлевилелдери-биле боттарын таныштырар боор деп бүзүрелин илереткен. Бо чоокку ийи чылда Россияның дээди өөредилге черлеринге 45 муң бюджет олуттарын немей ажыдар, оларның 70 хуузун регионнарга хуваар. 

Чурттуң Президентизи Россияның экономиказынга хамаарыштыр айтыышкыннарны берген. «Энергетиканы хөгжүдери дизе, чаа комплекстиг базымнар херек. Атомнуг генерация адырында, водородтуг энергетика база энергия мөөңнээшкини дээн ышкаш кедилиг угланыышкыннарга чаа шиитпирлерни хүлээр. Климаттың өскерлиишкиннеринге таарыштыр базымны кылыр. Көдээ ажыл-агыйын, үлетпүрнү, ЧКА, бүгү-ле инфраструктураны аңаа таарыштыр тургузар» — деп, президент чугаалаан. Регионнарга үш хуудан хөй эвес ставкалыг инфраструктура бюджет чээлилерин 15 чыл хуусаага бээрин саналдап киирген. Бюджетте ол сорулгага 500 миллиард рубльди 2023 чылга чедир планнаан.

«Өрегелерни газчыдарының чиге планын ажылдап кылырын чазактан диледим» — деп, Россияның президентизи демдеглээш, өрегелерге чедир газты чорутканын кижилер ону төлевес ужурлуг. РФ-тиң кабмини аъш-чем өртектерин турум байдалга тудар дээш рынок байдалдарын тургузарын президент демдеглээн. Путин биче болгаш ортумак бизнести деткиир немелде хемчеглерни – чээли, үндүрүг, садыг-саарылганы калбартырын  саналдаан.

 Тываның Баштыңының албан-хүлээлгезин күүседип турар Владислав Ховалыг Айыткалда салдынган сорулгалар республикага база дорт хамааржырын демдеглээн. Ылаңгыя чурттакчы чонну деткээн хемчеглер Тывага чугула херек. Айыткалда айыттынган угланыышкыннарда ажылды дарый эгелээри-биле, удуртулганың федералдыг органнары-биле кады ажылдаарының эптиг аргаларын тывар. Тываның Баштыңының албан-хүлээлгезин күүседип турар В. Ховалыг чанып келген дораан республика чазаанга база тус чер бот-башкарылгазының органнарынга чогуур даалгаларны бээр.