Республика Чазаанга чайгы кадыкшылга кампаниязынга белеткелди чугаалашкан

Марттың Чазак даргазының оралакчызы Саида Сенгииниң дыштанылга кампаниязын организастыг эрттирер дээн даалгазы езугаар, “Азия төвүнде дыштанылга” деп регион төлевилелиниң паспортун бадылаан. Күүсекчи эрге-чагырганың харыысалгалыг федералдыг органнарының киржилгези-биле яамының деңнелинде ведомстволар аразының координация чөвүлелиниң хуралы болгаш өөредилге семинарлары, курстар эрткен. 

Роспотребнадзорнуң ТР-де эргелели лагерьлерге ажылдаар кижилерге белеткелди март айдан ырактан эгелээн. 336 ажылдакчыны өөреткен. Тываның билиг-мергежил бедидер институтка, Ак-Довурактың даг техникумунга поварның мергежилин бедиткен, апрель 29-30-де лагерь начальниктеринге болгаш кижизидикчи башкыларга мергежил бедидир курстар болур. Тываның күрүне университединиң баазазынга апрельдиң 19-тан 24-ке чедир, «Инструктивтиг лагерь» өөредилге практиказы-биле лагерьлерге ажылдаар вожатыйларны белеткээр, ону эрткен студентилер вожатыйның сертификаттарын алыр. 

2021 чылдың планында лагерьлерниң реестрин бадылаан, 185 лагерь 15041 ажы-төлдү хүлээп алыр. 164 хүндүскү лагерьлерге - 11101 уруг, хоорай кыдыының 21 лагеринге – 3940 уруг дыштаныр. Республиканың күш-ажыл болгаш социал политика яамызының шугуму-биле амыдыралдың берге байдалында 2441 уруг дыштаныр. Аңгы-аңгы угланыышкыннарлыг тускай сменаларны шупту лагерьлерге организастаар. Ак-Довурак хоорайда «Шимчээшкини кызыгаарлыг уругларга школа-интернат» ТР-ниң КБӨА-га кадыкшылы кошкак 35 уругнуң дыштанылгазын организастаар. А лагерьлер июньдан эгелеп ажылдаары планнаттынган. Уругларның чайгы дыштанылгазын организастаарынче 167 266,9 муң рубль көрдүнген. 

“Азия төвүнде дыштанылга” регион төлевилелинде көрдүнгени езугаар, уругларның кадыкшылга албан черлериниң удуртукчулары сезон ажыттынарга чедир 5-10 хонук бурунгаар санитар-эпидемиологтуг түңнел бижикти алыр ужурлуг. ТР-де Росгвардия, ТР-де ФСБ, ТР-де ОБЯ эргелелдери-биле кады лагерьлерниң террорга удур айыыл чок чоруунуң паспорттарынга чөпшээрелди тыпсыр. Бөгүнде 164 хүндүскү лагерьлерниң 121-и паспорттарын чөпшээреткен, артканнары ам-даа ажылдап турар. Саргыга удур дээш ниити арыглаашкынны чорудар 185 керээ чардынган, аъш-чем хандырылгазы дээш 315 керээни чарган. 

Дыштанылга лагерьлеринге ажылдаар башкыларның болгаш техниктиг ажылчыннарның баазазын тургускан. Аъш-чем продуктуларын, дериг-херекселдер болгаш чымчак инвентарь эккээр черлерниң даңзызы тургустунган. 

Хоорай кыдыынга хамааржыр 21 лагерьниң 16-зы арга-арыгда ийикпе, азы арга чоогунда черлерде. Ынчангаш лагерьлерниң удуртукчулары лагерь девискээрин долгандыр черни май 10-га чедир чардырар ужурлуг. Бо хүнде чүгле «Шивилиг» лагерин долгандыр черни чардырган. 

Чайгы кадыкшылга кампаниязының үезинде уругларны дыштандырып, кадыын быжыглаарындан аңгыда, 217 түр үениң дыштанылга төптерин: 

- өөредилге шугуму-биле – немелде өөредилге албан черлеринге 11 төп;

 - спорт яамызының шугуму-биле – спортчу школалар баазазынга 21 төп; 

- культура яамызының шугуму-биле – библиотекалар база культура бажыңнарының баазазынга 185 төптерни ажылдадыры көрдүнген. 

Чазак даргазының оралакчызы Александр Брокерт уругларның кадыкшылга албан черлерин бедик мергежилдиг башкылар-биле четчелээрин, лагерьлер башкыларының, эмчилериниң база өске-даа ажылдакчыларның билиг-мергежилин бедидер курстарны эрттирерин өөредилге болгаш эртем яамызы база муниципалдыг тургузуглар чагыргаларының удуртукчулары-биле кады кылырын дааскан. Кадык камгалал яамызы лагерьге ажылдаар ажылдакчыларның вакцинациязын үе шаанда кылып, халдавырлыг аарыгларга удур анализтер дужаар графикти тургузуп, эмчи шинчилгезин эрттирер эмчи кадрларны четчелээрин хандырар. А культура болгаш спорт яамылары культура бажыңнарынга база библиотекаларга, спортчу школаларга база шөлдерге түр үениң дыштанылга төптериниң хемчеглер программаларын ажылдап кылгаш, бадылаар.