Тываның Чазаанга орук тудуунуң айтырыгларын чугаалашкан

Бо хүнде 11 объектиде 62 орук техниказы база 120 орук ажылчыннары хаара туттунган. 13 объектиде белеткел ажылдары чоруп турар. Муниципалдыг тургузугларга күрүне деткимчезин көргүзер дээш, тус черлерниң орук адырында объектилеринге 105,4 млн рубльди кады акшаландырыышкын кылдыр тускайлаар эрге-хоойлу төлевилелин белеткээрин планнаан. Бо үеде 16 муниципалдыг тургузуглар документилерин белеткеп турар. 

Март 26-да ТР-ниң Чазаа биле Росавтодор 216,0 млн. рубль хемчээлдиг немелде акшаландырыышкынны федералдыг бюджеттен тускайлаар дугуржулганы кады чарганын Чазак Даргазының оралакчызы Бады Олег Ооржакович чугаалаан. Кызыл хоорай девискээринде: Бай-Хаакская база Пушкин кудумчуларында 2 объектиже немелде акшаландырыышкынны бээр талазы-биле керээни 2021 чылдың апрель төнчүзүнге чедир чарар. Кызыл хорайның Бай-Хаакская база Пушкин кудумчуларында немелде объектилерге хамаарыштыр керээни үе шаанда чарарын хандырарын Кызыл хоорай мэриязы биле орук-транспорт комплекизиниң яамызы кады кылырын саналдаан. 

Тыва Республиканың Баштыңының албан-хүлээлгезин түр када күүседип турар Владислав Ховалыг 2025 чылга чедир туттунар орук объектилериниң даңзызын киирерин, ол ышкаш даңзыны ам-даа көвүдедир даалганы харыысалгалыг оралакчыларынга берген. Сөөлгү чылдарда машина-балгаттың санының көвүдээни-биле оруктарның кызаа апарганын, ылаңгыя найысылалдың хоорай оруктарынче кичээнгейни углаарын, төп кудумчуларда транспорт шимчээшкинин таарыштырар дээш, кыйыы кудумчуларны ажыглаарын, чадаг кижилер кылаштаар оруктарны калбартырының аргазын тыварын айыткан. Ынчангаш ол айтырыг талазы-биле тускай комиссияны тургузарын саналдаан. 

Владислав Товарищтайович орук организацияларының төлээлеринге автооруктарны тудуп тура, чаа федералдыг стандарттар езугаар шынарлыг кылырын айтып, ам база катап ужуражырын дугурушкан. 

«Восток» КХН-ниң удуртукчузу Сергей Уюсов-биле Бояровка – Тоора-Хем автооруунда Бии-Хемни кежир көвүрүг тудар улуг төлевилелдиң чорудуун база Кызыл биле Шагаан-Арыг хоорайларже кирер оруктарның дугайында чугаалашкан. ТР-де «Енисей» Орук эргелели ФКА-ның директору Владимир Мельников-биле чидиг айтырыгларны чугаалажып көөрү-биле кады хуралды эрттирерин планче киирген. 

Владислав Ховалыг хуралдың түңнели-биле, Ак-Довурак - Чадаана база Кызыл-Эрзин автооруктарны федералдыг өнчүже дүрген шилчидер ажылды уламчылаарын харыысалгалыг удуртукчулардан негээн. Ол оруктар Россияның кол орук четкизин хөгжүдер планның төлевилелде кирген. Оон аңгыда В. Ховлыг Баян-Кол Кызыл кожууннуң Баян-Кол суур чанында оруктуң айылдыг участогунга төлевилелди белеткээрин саналдаан.