Кызылга «Хостуг тыныш» экологтуг акция эрткен

Тываның Баштыңының хүлээлгезин күүседип турар Владислав Ховалыг «Хостуг тыныш» республиканың экологтуг акциязынга киришкен. 

Өг-бүле сесерлииниң девискээринге хадылар олуртур акцияга чазак даргазының оралакчызы - бойлус курлавырлары база экология сайыды Шолбан Хопуя, сайыттың оралакчызы Темир Сарыг-Хаа, арга-арыг комитединиң ажылдакчылары, волонтерлар, спортчулар, студентилер, идепкейжи хоорай чурттакчылары киришкен. 

Экологтуг культураны база төрээн чериниң бойдузунга хумагалыг хамаарылганы бедидип, ыяш аймаан олуртуп, үнүш объектилерин камгалаар айтырыгже хөй-ниитиниң кичээнгейин хаара тудар сорулгалыг акцияны Бойдус курлавырлары болгаш экология яамызы, Спорт яамызы, Кызыл хоорай мэриязы организастаан. 

«Буянныг акцияга дыка хөй хоорайжылар киржип келгенинге өөрүп тур мен. Долгандыр хүрээлелге камныг болурун кыйгырып тур мен. Шагда маңаа теректер турган чүве, ол ногаан девискээрни катап ногаанчыдар херек. Дыка хөй өг-бүлелер чыглып келген-дир. Ындыг болур ужурлуг-даа. Өг-бүле сесерлии хоорайжыларның дыштанырынга чараш, аянныг, онзагай чери апаарынга бүзүрээр мен» – деп, Владислав Ховалыг чугаалаан.