Тываның Көдээ ажыл-агый яамызы: Кызыл хоорайда агроүлетпүр парыгының девискээринге бүдүн чылда ажылдаар теплица комплекизин ажыдар

РФ-тиң Кадык камгалал яамызының сүмези езугаар 1 кижи 140 кг ногаа аймаан чемге ажыглаар ужурлуг. Ынчап кээрге республикага ол хереглел ниитизи-биле 13,25 муң тонна болуп турар. Амгы үеде чүгле 25 хуу хирези хандыртынып турар. 

Тываның агаар-бойдузун өөренип көргеш, чайгы кыска үе дургузунда ажык шөлге ногаа бүдүрүлгези болдунмазы-биле, ногааларны хааглыг черге олурткаш, ооң дүжүдүн 2-3 катап көвүдедип ап болур. Бүдүн чылда ажыглаар теплица комплекизинге ынчаар тараан тус черниң ногаалары республиканың чурттакчы чоннуң хереглелин доктаамал хандырып болур.

Төлевилелде бүрүн дериг-херекселдерлиг – теплицаны эптээр кылыглар, иштики дериглер, суггарар, чырыдар херекселдер, дезинфекция чорудар херекселдер, чырык шугумун шөейри база тудуг-монтаж ажылдары кирген комплекстиг тудуг тудары көрдүнген. 

Оон аңгыда, суг, чылыг, чырык хандырылгазы, трансформатор подстанциязы, бүдүрүлге аңмаары, хөмүр котельнаязы кирген инфрастуруктураны база бар. Арга-дуржулга солчулгазын Тыва-биле дөмей агаар-бойдустуг Якутияда теплица комплекизиниң ажылдакчыларындан алган. 

Кызыл хоорайда агроүлетпүр парыгының девискээринге бүдүн чылда ажылдаар теплица комплекизи ажыттынарын республиканың Көдээ ажыл-агый яамызы дыңнаткан. Төлевилелди боттандыргаш, чылда 650 тонна ногаа аймааның дүжүдүн алыр, аңаа 40 ажылчын олуттар тургустунар. Үндүрүг болгаш камгаладылга дадывырлары кылдыр 2,24 млн. рубльди чыл санында шилчидер. Российжи ногаалар рыногунда садып-саарып турар даштыкы ногаа продукциязын болгаш ногаан культураларны солуур арга тыпты бээр. Ынчан республика чурттакчыларының ногаага хереглелиниң 37 хуузун боттуң продукциязы солуптар.