Тываның мөгези Монгуш Начын хостуг хүрешке Россия чемпионадының түңнел салыынче эрткен

Тыва Республиканың чыынды командазында 11 мөге ында киржип турар. Россияның спорт мастерлери Дондук-оол Хуреш-оол, Монгуш Начын, Чамзын Амир, Седен Кежик, Кужугет Белек-оол, Сюрюн Омак, Монгуш Кежик, Тюлюш Эзир, Монгуш Чаяан, спорт мастеринге кандидат Седивес Денис, делегей чергелиг класстың Россияның спорт мастери Казырык Сайын олар чыынды командада. 

Тыва мөгелер 57 кил чедир деңзиге чараш болгаш чидиг оюннарны көргүскен. 2021 чылдың Россия чемпионадының бирги хүнүнде чартык финал оюннарже ол деңзиде Монгуш Начын биле Кужугет Белек-оол эрткен. Март 11-ниң кежээзинде, төнчү салыгже Монгуш Начын эрткени, а хүлер медаль дээш Белек-оол Кужугет хүрежири билдине берген. 

Тываның Баштыңы Шолбан Кара-оол тыва мөгелер дээш “аарып” турар. Токиога эртер олимпиадаже тыва спортчулар чоруур апарза, оларны албан деткиирин чугаалаан. «Маргылдааның бирги хүнү чедиишкинниг болду. Эң шыырак сес мөгениң санында Тыва Республикадан 4 спортчу кирген!» - деп, Тываның Баштыңы өөрүнчүг медээни дыңнаткан.

Бирги хүнде болган салыглар соонда, чартык финалда мындыг мөгелер арткан: 

57 килде: Азамат Тускаев (Москва облазы) – Начын Монгуш (Тыва Республика). Завур Угуев (Дагестан) – Кужугет Белек-оол (Тыва Республика). 

86 чедир килде: Артур Найфонов (ХМАО) – Нагомед Рамазанов (Дагестан). Ахмед Гаджимагомедов (Дагестан) – Даурен Куруглиев (Дагестан). 

92 чедир килде: Магомедов Курбанов (Дагестан) – Гурам Черткоев (Крым). Анзор Уришев (Красноярский край) – Азамат Закуев (Крым).