Россияның Тудуг яамызының удуртукчузу Тываның тудуг адырында ажылдарның шынарынга үнелелди берген

Россияның тудуг яамызының удуртукчузу Кызылга эрткен хуралда сөстү алгаш, сөөлгү чылдарда тудуг комплекизин деткээн күрүне механизмнерин идепкейлиг ажыглаарынче Тываны база катап кыйгырган. 

«Премьер-министр баштаан делегациязы-биле барып четкенивис шупту объектилер шынарлыг туттунган-дыр – деп, Ирек Файзуллин демдеглээн. – Тудуглар айыттынган хуусаазында туттунган болгаш ажыглалче кирген». 

Россияның Тудуг яамызының удуртукчузу девискээрлерге комплекстиг тудугларны тудар талазы-биле республиканың планын үнелээн. Аварийлиг чуртталга бажыңнарындан хамаатыларны өскээр көжүрер программада оран-саваның өртээнде карышкактар барын чугаалаан. 

«Регионнарның шупту чарыгдалдары дөгере кирбейн турары шын, ындыг болзажок чамдык дотациялыг регионнарга немелде акша-хөреңгини үндүрүп бербишаан, ол айтырыгны шиитпирлээрин чедип алыр апаар – деп, Ирек Файзуллин чугаалаан. – Оон башка тудугжуларны өске азыгче чыгап кээр бис, а өске талазындан көөр болза, тудуг адыры үндүрүглерин чедир төлевейн база барып болур». 

Республика тудуг адырын хөгжүдер дээш бүгү-ле бар аргаларны ажыглап, немелде ажылчын олуттарны ажыдар талазы-биле ажылды күштелдирер ужурлуг деп, сайыт чугаалаан. «Чурттакчы чоннуң тудуг адырынче киирилдени салырынга беленин ажыглаар херек – деп, Ирек Файзуллин саналдааш, – эрткен чылын силерде, республикада, ипотека чээлизи алган керээлерниң саны 27,8 хуу өскени демдеглеттинген”. 

Россияның Тудуг яамызының удуртукчузу чүгле эрткен чылда Тывага ниитизи-биле 5,56 млрд рубльга ипотека чээлизи алганы демдеглеттинген деп айыткан. Ооң чугаазы-биле алырга, республикада ипотека чээлизиниң ниити хемчээли 48 хуу көвүдээн болуп турар. «Республика шак ындыг эки көргүзүүн салбас ужурлуг. Чиигелделиг ипотека программазын уламчылаарын ам-даа бадыткаар бис” - деп, Ирек Файзуллин чугаалаан. 

Көдээ ипотека программазының боттанылгазынга республика идепкейлиг киржир ужурлуг деп, Росияның тудуг сайыды демдеглээн. «Силерниң көдээ ажыл-агый яамызы ол ажылга идепкейлиг болурун күзедим. Элээн каш көдээ ажыл-агыйлыг регионнарда көдээ ипотека солун үре-түңнелдерни берген болгай” – деп, Ирек Файзуллин дыңнаткан.