Тываның Чазаанга чайынды суунга алзып болур оруктарның байдалын чугаалашкан

«Оруктарны хандырар ажыл-агыйлар штаттыг чурумда ажылдап турар. Р257 федералдыг оруктуң база регион оруктарын кышкы үеде хардан аштап-арыглаар ажылдарже хүннүң-не 167 ажылчын үнүп, 80 санныг тускай техниканы ажыглап турар» - деп, оралакчы дарга чугаалаан.

Тос автомобиль арттарында хондур-дүндүр дежурныйлаашкынны организастаан. Дөрт дош кежиглерде байдал ажырбас, аар машиналар эртер черлерде ийи кышкы өртээлди ажыткан. Ол ышкаш кол оруктарда чылыгланыр черлерни организастаан. Чартык айдан хөй үе иштинде 23 чолаачы шак ындыг пунктуларга доктааган. 

Мөңгүн-Тайга кожуунче онза кичээнгейни салыр деп, Тываның Баштыңы Шолбан Кара-оол айыткан. Чамдык черлерде чайынды суу ажыттынып эгелээнин кожуун чагыргазы дыңнаткан. Малчын коданнарже баар оруктарның чамдык черлери чайындылаан. 

Регионнуң Баштыңы орук-транспорт комплекизиниң сайыдын кожуунче чорудуп, байдалды көрүп, чогуур шиитпирлерни дарый алырын дааскан. «Онза байдалдан чидиригни болгаш ооң уржуктарын чайладыр чарыгдалдарны эвээжедир дээш, оон-даа дүрген хөделир ужурлуг бис» - деп, Шолбан Кара-оол демдеглээн. 

Чайгы үеде хемнер уннарын аштап, камгалал чалдар кылып албаан, кышка эки белеткел чок суурлар сугга алзыптарын демдеглээн.