Тываның Баштыңы амгы үеде COVID-19 - дугайында: байдалды тудары чугула

Октябрь 1-ден 2 хүнүнде Тывага ооң мурнунда хүнге бодаарга 6 сан эвээш, азы 33 чаа аараан кижи демдеглеттинген. Тываның Баштыңы ындыг болзажок, амгы үеде коронавирус байдалы турум эвезин дыңнадып, школаларга шыңгыы контрольду турары күзенчиг деп,айыткан. 

«Чижээ, Таңды кожуунда, сөөлгү хонуктарда 8 чаа таварылга илереттинген, ооң 4-ү башкыларда. Байдалды көөрү-биле ынаар эмчилер биле эпидемиологтарның каттышкан комиссязын чоруттум” – деп, Тываның Баштыңы дыңнаткан. 

 Школалар, уруглар садтарынче кирер черлерге термометр-биле хыналданы күштелдерин негээн. Инфекцияга каразынчыг башкыны-даа, өөреникчини-даа аңгылаар. Байдалды көрүп, өөредилгени кызыгаарлаар дугайында шиитпирни чүгле школа директору үндүрер. Понедельникте аппарат хуралында чугаалааны ышкаш, санитарлыг шупту чурумнарны хажыт чокка күүселдезин чедип алыр ужурлуг кижи бир дугаарында ол болур.

 «Чаңгыс чер-чурттуглар, хамчык халдавыр амыдыралчы планнарывысты дөзүнден соксадып, кадыкшылды кошкадып, амы-тынны албазын дээш байдалды тудары чугула. Херек кырында дүрүмнер көңгүс бөдүүн – масканы кедер, холду доктаамал чуур, дезинфекция бүдүмелдерин ажыглаар, херек чокка чүвеге аай-дедир харылзашпас, халдавыр өскээн черлерже барбас. Чоокта чаа российжи эртемденнер шинчилелдер чоруткаш, маска кедип турар кижилер чүгле коронавирустан эвес, а ОРВИ-ден база эвээш аарыырын тодараткан” – деп, Шолбан Кара-оол чугаалаан.