Ажы-төлдүг өг-бүлелерни деткээн немелде төлевирлер бүрүнү-биле төлеттинер

Тыва Республиканың Баштыңы чурттуң Президентизиниң чонга медеглелинге даянгаш, алыр ужурлуг кижилерге күрүнениң талазындан тускай сорулгалыг көрдүнген деткимче дуза үе-шаанда четкен турзун дээш ажылдарны чорударын чазактың социал адырын харыылап турар удуртукчуларга онааган турган.

Август 24-те, эрткен Тываның Чазааның аппарат хуралында, ажы-төлдүг өг-бүлелерни деткээн адрестиг төлевирлерниң канчаар чоруттунуп турарын база чугаалашкан. Тыва Республиканың Чазааның даргазының оралакчызы С.Х.Сенгии бо хүннүң байдалы-биле, 3-7 хар чедир назылыг ажы-төлдүг өг-бүлелерге немелде деткимче төлевилерниң дугайында дыңнаткан. 

“Тыва Республиканың Күш-ажыл болгаш социал политика болгаш Саң-хөө яамылары кады ол айтырыгны доктаамал хайгааралда тудуп турар. Республикага көрдүнген 3-ден 7 хар чедир назылыг бичии чаштар дээш ай санында ада-иелерге акша-төлевириниң арткан кезии - 496 ажыг млн. рубльди муниципалдыг тургузугларже пятницада, август 21-де, шилчиткен. Ол дээрге Сүт-Хөл (157), Чөөн-Хемчик (456) кожууннарда база Ак-Довурак хоорайда (560) ада-иелерниң деткимче төлевир дилээн июнь, июль айларның билдириишкиннеринге даянып, чоруткан акшаландырыышкын болур. Оон аңгыда ниити түңү 168 млн рубль бо хүннерде Кызыл хоорайда база чамдык кожууннарда арткан 2525 билдириишкин ээлериниң агар саннарынче июль ай дээш кирер. База ол ышкаш август айга тускайлаан 180 млн рубль база Тывада чедип келген. Тываның Баштыңының чаа өөредилге чылының бүдүүзүнде ажы-төлдүг өг-бүлелер көрдүнген бүгү-ле төлевирлерни сентябрь 1-ге чедир алган турзун деп айтыышкынын күүседири-биле, бо ай төнчүзүнге чедир ол деткимче акшалар шупту төлеттинер. Муниципалдыг чагырга даргалары социал политика эргелелдеринде кирген тускай сорулгалыг төлевирлерни ада-иелер бо неделяда алган турарын чедип алыр дээш хыналданы күштелдирер ” – деп, С. Сенгии чугаалаан. 

ТР-ниң Күш-ажыл яамызының берген медээзи-биле алырга, 3-ден 7 хар чедир назылыг бичии чаштарынга ай санының төлевирлеринге ниитизи-биле 32226 билдириишкиннер ада-иелерден кирген. Оларның 17017-зин күрүне ачы-дузаларның чаңгыс аай порталын таварыштыр, 5017-зын хөй талалыг ачы-дуза чедирилге төптерин, а 10192-зин социал хөгжүлде эргелелдерин дамчыштыр киирген. 3 хардан 7 хар чедир 33033 ажы-төл бар 25021 өг-бүлеге ай санының төлевирин төлээрин доктааткан. Бо хүнге чедир 30676 ажы-төл бар 24096 өг-бүлеге 877 млн ажыг түңнүг деткимче төлевирни төлээн.