Республиканың Баштыңы – Тывага Наадым национал байырлалды пандемия үезинде бир тускай эрттирер

"Наадым хүннерин чылдың-на тускай шиитпир-биле доктаадып турган бис, бо удаада халдывырлыг аарыгның онза үезин чурттап эрттип турар болганывыста, ону сентябрьның 3-4-те деп тодараттывыс. Малчыннарның байырлалын албан демдеглээр деп кижи бүрүзү чаңгыс үн-биле деткээн. Ам хемчеглерни онза чурум-биле эрттирер апаар” – деп, "Контактыда" бодунуң арынында Ш. Кара-оол дыңнаткан.

Эпидемиологтарның сүмелээни-биле, чаңчылчаан аът чарыжын чурттакчылыг черлерден ырадыр, Тес-Хем биле Эрзин кожууннарның девискээринге эрттирип, маргылдааның шупту киржикчилерин эмчи хайгааралынга алыр. "Субедей" спорт комплекизинге хүреш маргылдаазын сентябрьның 3-4-те эрттирер. Ынчан айыыл чок чоруктуң бүгү хемчеглерин сагыыр: мөгелер коронавируска шинчилгени эрттер, көрүкчүлер залдың 50 хуузун ээлээр. Интернетке аът чарыжын болгаш хүрешти дамчыдар.

 Хүреш – тываларның национал оюну. Маргылдаа ажык дээр адаанга эрттер. Эң сөөлгү салыгда арткаш, тиилээн мөге шүглүп үнер. Мөгелер шөлге эзирниң девиин күүседир. Онаан ашкан мөге база девигни күүседир. Мөгелер девип тура, Мөңге Ак-көк Дээрге мөгейиин илередип турар ол болур.