Тываның Баштыңы Россияның тускай дээди өөредилге черлериниң доозукчулары-биле чаңчылчаан ужуражылганы эрттирген

Тыва Республиканың Чазак Бажыңынга 41 доозукчуга чагыг сөстерни дамчыткан. «Чылдың-на, чепсектиг күштер ведомстволарының удуртукчулары-биле, тускай дээди өөредилге черлерин дооскан доозукчуларны чылыы-биле уткуп, ОБЯ, ИХЯ, КЭХФАЭ, АФАЭ база Кызыгаар отрядының одуруунче ажылдаар кылдыр хүлээп алырывыс чаңчыл апарган – деп, Тываның Баштыңы Шолбан Кара-оол бодунуң блогунда бижээн. - Россияның өске регионнарындан бистиң республикада албан аайы-биле келген оолдарга чурттуң онза булуңу Тываның, ооң бот-тускайлаңын чугаалап бээр кижи мен. Тыва чон алызындан хүндүлээчел, ажык сеткилдиг, шериг кижилерге онза хамаарылгалыг. Ынчангаш Тыва оолдарга төрээн бажыңы ышкаш апарып, чедиишкинниг болгаш үре-түңнелдиг депшип ажылдап, а амыдыралы солун, чымыштыг болурун аныяк специалистерге күзедим. Бөгүнде республика кайнаар углай бурунгаар хөгжүп бар чыдарын, Тыва – көшкүн чоннуң чурту, Росияның Маадыры Сергей Шойгунуң төрээн чери, республика – эрес-дидим чоруктуң девискээри дээрзин сонуургаттым. Күчулүг Россияны база бистиң республикавысты кады тургусчуп, хөгжүдеринче кыйгырдым. Бо чылын 41 доозукчу ОБЯ, ИХЯ, КЭХФАЭ, АФАЭ, Кызылдың девискээр гарнизонунда күш-ажылчы базымын эгелээн. Кирип моорлаңар!» 

Россияның Онза байдалдар яамызының дээди өөредилге черлеринге өртчү угланаашкынны дооскан 9 доозукчу Россияның ОБЯ Тыва Республикада Кол эргелелинде ажылдап чедип келген. Аныяк офицерге арга-дуржулгалыг дагдыныкчыларны быжыглап, деткип турар. Чурттап турар черлериниң аайы-биле аныяк офицерлерни өрт-камгалал кезектеринде үлээн.

Тыва Республиканың ИХЯ-да келген 12 доозукчу полицияның бүрүн эргелиг участок албаннарында, экономиктиг айыыл чок чоруктуң опер төлээ бөлүүнде, истекчи, истеп-тывар опер төлээ, наркоконтроль эргелелиниң опер төлээ кылдыр ажылдап кирген. 

Россияның Кеземче күүселдезиниң федералдыг албанының дээди өөредилге черлерин 7 кижи дооскан.

 Россияның Федералдыг айыыл чок албанының Кызыгаар эргелелинде 3 доозукчу немешкен.

Россияның шериг-өөредилге черлерин 10 кижи дооскан, олар шупту Кызылдың девискээр гарнизонунга ажылдаар.