Тываның Өөредилге яамызы – орус дылга ЕГЭ чогуур чурумга эрткен

Ол хүн күрүнениң чаңгыс аай шылгалдазын эрттиреринге республиканың шылгалда хүлээп алыр шупту 24 пунктулары ажылдаан. ЕГЭ эрттер шупту пунктуларга санитарлыг хыналданы шыңгыыраткан: аудиторияларны дезинфекциялап, кирип турар кижилерниң эъдиниң изиин хынап, өрээлдерге хол аштаар антисептиктиг дозаторларны салган. Кижи бүрүзүнүң аразы 1,5 метр болур дистанцияны сагаан.

Шылгалда эрттирер пунктуларның 24 удуртукчулары, КШК 61 кежигүннери, 78 техниктиг специалистер, аудиторияда база аудиториядан дашкаар 559 организаторлар, 38 эмчи ажылдакчылары база 44 хөй-ниити хайгааракчылары ЕГЭ-ни эрттиреринге хаара туттунган. 

«Шылгалда чогуур деңнелге эрткен. Шылгалданың киржикчилери боттарының түңнелдерин 2020 чылдың июль 20-де билип ап болур» - деп, «Тыва Республиканың өөредилгениң шынарынга үнелел бээр институт» КБА-ның директору – информация болбаазырадыр регион төвүнүң удуртукчузу Согун-оол Кыргыс дыңнаткан.  

РФ-тиң аккредитациялыг дээди болгаш ортумак тускай өөредилге черлеринде угланыышкыннар аайы-биле дужаап киреринге орус дылга ЕГЭ-ниң түңнелдери албан херек. Аудиторияга хөй кижи чыгбазы-биле, орус дылга күрүнениң чаңгыс аай шылгалдазын ийи аңгы хүнде эрттиргенин сагындыраал. 

Шылгалда дужаар кылдыр бүрүткеткен кижилерниң чамдыызы 2020 чылдың июль 7-де орус дыл шылгалдазын дужааган.