Тываның Баштыңы: эмчилеривис халдавыр-биле демисежир арга-дуржулганы шиңгээткен

«Республикада коронавирус-биле демисежип турар шупту эмчилерге база Халдавырлыг аарыглар эмнелгезинде эмчилеримге сеткилим ханызындан четтиргеним илереттим. Эмнээшкин курузун эртип чыткаш, эмчилеривис инфекция-биле демисежир чиге билиишкинниг болгаш, арга-дуржулгалыг апарып, боттарынга бүзүрелдиг-дир деп билдим. Халдавыр-биле демисежирин тодараткан. Байдалдың канчаар өскерли бээрин хайгаарап турар. Шупту чүве контрольда. Аарыгның илереттинери көвүдээн-даа болза, чаңгыс чер-чурттугларывыс-биле шылгалданы эрте бээр бис. Деткимчеңер дээш шуптуңарга четтирдим, байдалым ажырбас, организм ону шыдап эрткен, өске аарып турар кижилер аарыгны чиик эрте бээрин сеткилимден күзедим» - деп, Тываның Баштыңы эмнелгеден үнгеш бодунуң бодалдары-биле үлешкен.

Тываның Баштыңы Шолбан Кара-оол оон аңгыда ажыл-агыйжы чугула айтырыгларны онзалап демдеглээн:

«Экономиканы катап диргизип, чыл программазы-биле кылыр ужурлуг стратегтиг шупту угланыышкыннарны шимчедири меңээ болгаш шуптувуска ам мурнады кылыр ажылдар ол болур. Тудуг объектилери, Тываны хөгжүдериниң бот-тускайлаң планын күүседири, көдээ ажыл-агый бүдүрүкчүлерин деткиири аңаа хамааржыр. Ылаңгыя биче болгаш ортумак бизнеске онза кичээнгей, чиге хамаарылга негеттинип турар. Коллегаларым-биле ону шыңгыы көөр бис. ЕГЭ-ни дужаарынга таарымчалыг байдалдарны тургузары, уругларга школа дозуп алыр арганы бээри, Конституцияже эдилгелер киирер талазы-биле бадылаашкын чогуур деңнелге эртер кылдыр белеткелди чорудары- июньнуң чугула хүн айтырыгларынга хамааржыр. Камнаныңар. Шупту чүве эки болур».