Тываның Баштыңы республикаже кирер орукта санитар постузун хынаан

«Бистиң республикаже кирер оруктар кайы хире камгалаттынганын хынап чордум. «Шивилиг» постузунда бистиң эң-не кызымаккай оолдарывыс ажылдап турар-дыр. Бии-Хем кожуун эмнелгезиниң эмчи сестралары база. Роспотребнадзорнуң удуртукчузу бодунуң доскуулун база тургускан. Чоннуң кадыкшылын камгалаар хемчеглерге дузалажырын удуртукчулардан дилеп тур мен. Чумага удур костюмнар дарый херек бооп тур. Мурнуку одуругда ажылдап турар оолдарны дежурныйлар-биле солуурун хандырар болза эки-дир. Постуларда ажылдап турарларга бүгү республиканың чонунуң мурнундан четтиргеним илереттим. Бодунуң ажылынга ам-даа шыдажыптарын диледим. Чаңгыс чер-чурттугларывыс хыналдаларны билиишкинниг хүлээп алыр боор деп, идегеп тур мен. 

Марттың 27-ден апрель 3-ке чедир, Тываның девискээринче «Шивилиг» постузун таварып кирген 3501, «Актап» эрткен 512 автомашиналарны хынаан. 7300 кижиниң анализин ап, тестированиени эрттирген. Бо хүннүү-биле коронавирустан аараан чаңгыс-даа таварылга чок. Коргунчуг халдавырга удур бүгү-ле негелделерни хажыт чокка сагыырыңарны диледим».