ТАСС: РФ-тиң Чазаанче Тываның шапкын хөгжүлдезиниң тускай программазын киирген

Россияның Чазаанче дамчыткан, регионга ажылдап кылган Тываның социал-экономиктиг хөгжүлдезиниң тускай программазында амгы үениң инрфаструктуразын тудуп, транспорт аргыжылгазын чедингир болдурары көрдүнген. 

Регионнуң Баштыңы Шолбан Кара-оол ооң дугайында “Контактыда” бодунуң арынында бижээн. 

Курганга болган хуралда, РФ-тиң Чазааның даргазы Михаил Мишустин РФ-тиң хожудаңгай хөгжүлделиг регионнарының социал-экономиктиг хөгжүлдезиниң тускай сорулгалыг программалары оларны түреңги чоруктуң зоназындан үндүрер ужурлуг деп демдеглээн. Ындыг регионнарның даңзызында Тыва база кирген болгаш, ооң кураторунга РФ-тиң экономиктиг хөгжүлде сайыдын томуйлаан. 

"Тываның социал-экономиктиг шапкын хөгжүлдезиниң тускай планын Россияның Чазаанче киирдивис. Бүдүн чыл дургузунда сан-чурагайларны ылавылап, чамдык чүүлдерни тодарадып, ажылдарны дугуржуп келдивис” – деп, Ш. Кара-оол бижээн. Тываның шапкын хөгжүлде программазы амгы үениң инфраструктуразын тудуп тургузарынче угланган. 

"Тываның транспорт: шынарлыг автооруктар, чаа кызыгаар-эрттирилге пунктулары, делегей аэропорту база демир-орук аргыжылгазының чедингири - республиканың бурунгаар хөгжүлдезиниң кол шимчедикчизи болур. Россияның өске регионнары-биле деңге сайзыраар байдалдар биске херек. Чүгле ынчан чурттуң ниити экономиказынче бүрүн күжүвүс-биле киржип болур бис” – деп, республиканың баштыңы түңнээн. 

2020 чылдан 2024 чылга чедир боттандырар тускай сорулгалыг программаже федералдыг бюджеттен 5 млрд. рубльди тускайлаары көрдүнген. Программа күүселдезин 2025-2027 чылдарже узадырын база чугаалажып турар. 

ТАСС