Шолбан Кара-оол Тываны хөгжүдер федералдыг планның белеткелин эң чугула деп санаан

Россияның Чазааның чаа даргазы Михаил Мишустин-биле ужуражырының сорулгазы ол айтырыг болур деп Шолбан Кара-оол сагындырган. 

«Бөгүнде Тываның Чазааның эң мурнады көөр айтырыы –Тываның социал-экономиктиг хөгжүлдезиниң тускай планынга хамааржыр бүгү-ле туруштарны федералдыг яамылар болгаш оларның аппараттары-биле база катап дүүштүрери болур – деп, Тываның Чазааның аппарат хуралында Шолбан Кара-оол чугаалаан. – Ынчангаш план төлевилелин шимчедип, российжи ведомстволарның талазындан ол ажылда киржип турар кижилер-биле чаңгыс үннүг болурун чедип алыр херек”. 

Тываның Баштыңы федералдыг яамыларның чаа томуйлаткан удуртукчулары-биле ужуражырын белеткеп бээр даалганы берген. «РФ-тиң Президентизи биске дорт-даа, хажыызындан-даа деткимчени берип турар – деп, Шолбан Кара-оол чугаалааш, күрүне баштыңы бодунуң айыткалында инфраструктура кызыгаарлаашкыннарын чайладырынче угланган төлевилелдер чаа чазактың мурунады шиитпирлээр айтырыы болурун сагындырган. – Ол биске дорт хамааржыр». 

Ындыг хөделиишкиннерниң арга-дуржулгазы мөөңнеттинген, кайда, кандыг чөрүшкектерни шиитпирлээр билиишкин бар деп, республика удуртукчузу демдеглээн. «Бо неделяда тускай угланыышкынныг яамылар шугуму-биле шалыпкын ажылдап кирер херек. Чаа премьер-министр Михаил Мишустин-биле, республиканың шапкын хөгжүлде планының төлевилелин чугаалажып көөр дээш, дүрген ужуражыр” – деп, Шолбан Кара-оол чугаалаан.