Тывада «Кадыкшыл оруу» төлевилел уламчылавышаан

«2011-2012 чылдарда Тыва Республиканың кадык камгалалын чаартыры» программа күүселдези-биле 2014 чылда ук комплексти садып алган. Эмчилерниң бригадазы 2019 чылдың 8 айының иштинде 54 үнүүшкүннерни кылган. Оларның 9-зу бичии уругларже угланган болгаш эрткен чылга деңнээрге 19 үнүүшкүнге хөй. 8 айның дургузунда тускай эртемниг эмчилер кожууннарда 18586 кижини шинчээн, оларның 9413 уруглар, эрткен чылга деңнээрге 5060 кижи хөй. Шинчилгени эрткен улуг кижилерниң хөй кезии кадыының байдалы-биле 1 биле 2 бөлүкке хамааржыр, 3-кү бөлүкте кирип турларның саны эвээжээн. 

“Кадыкшылдың оруу” төлевилел-биле 70 кижини шинчээн соонда, ооң 17-зи бичии уруглар, кожууннарның төп база Кызыл хоорайның эмнелгелеринге чыткаш эмнедир кылдыр чоруткан. Республиканың онкология диспансеринче 13 улуг кижини чоруткан. Тус черниң база Кызыл хоорайның эмнелгелеринге амбулаторлуг шинчилгелер эртер бижикти 1695 кижиге берген. 1404 аарыг кижини, ооң санында 167 уругларны диспансер учедунда алган. 

«Шира хөл», «Белокуриха», «Калуга-Бор», «Карачи хөл», «Даг агаары», «Бимлюк», «Васильевское» болгаш өске-даа санаторийлерге 2134 уругну дыштандырып, кадыкшылын быжыглаан. 

Шинчээн кижилерниң аарыгларының аайы-биле алырга, бирги черде - хан-дамыр эргилдезиниң, ийигизинде - чем хайылдырар органнарның, үшкү черде – нерв системазының, ол ышкаш ЛОР органнар биле карак аарыглары хамааржып турар. Төлевилелдиң кол сорулгазы – көдээ чурттакчыларга бедик мергежилдиг эмчилерниң база тускай мергежилдиг специалистерниң ачы-дузазын чедингир болдурары, аар аарыгларны эге чадазында илередири, чурттакчы чон ортузунга кадык амыдыралды суртаалдаары болуп турар.