“Өг-бүле бүрүзүнге бир дээди эртемниг уруг” губернатор төлевилели

Чүге дизе хөй ажы-төлдүг өг-бүлениң бир школа доозукчузу дээди өөредилге черинге тускай мергежилди чедип алыр болза, дараазында дуңмаларын ол бут кырынга тургусчуп, төрээн чериниң хайымныг ажыл-ижинге үлүүн киирип чоруй баар деп, республика баштыңы санаан. Ынчангаш 2014 чылда «Өг-бүле бүрүзүнге дээди эртемниг уруг» деп губернатор төлевилелин республикага эгелеп, ону амыдыралга боттандырарының арга-хевирлерин ажылдап кылыр даалганы республиканың өөредилге яамызынга берген турган. 

Бо үениң дургузунда губернатор төлевилелиниң негелделери чаарттынып, өскерилгелерни киирген. Ооң мурнунда төлевилелге школаның чүгле доозукчу класстар өөреникчилерин киириштирер турган болза, 2018 чылдан эгелеп төлевилел киржикчилериниң бөлүүн улгаттырып, ынаар школа назыны четпээн болгаш эге школа өөреникчилерин хаара туткан. Губернатор төлевилелиниң боттаныышкыны-биле чүгле дужаап киреринге тускай белеткелди эвес, а өөредилге чылдарында социал үделгелиг деткимчени көргүзүп турар апарган. Кызылдың президентиниң кадет училищезинче дужаап киреринге төлевилел киржикчилерин белеткээр тускай сорулга база бар. 

2019 чылдың июль 1-ниң байдалы-биле алырга, назы четпээн өөредилге организацияларында база ортумак ниити өөредилге албан черлеринде болгаш ортумак тускай болгаш дээди өөредилге черлеринде өөренип турар ажы-төлдүг 8012 өг-бүле губернатор төлевилелинде киржип турар. Ол өг-бүлелерден 362 уругга: 311 өөреникчиге, 36 школа назыны четпээннерге, ортумак тускай өөредилге чериниң 2 сургуулунга база дээди өөредилге чериниң 3 студентизинге социал угланыышкынныг дузаны көргүзүп турар.