Тывада 215 кижи профильдиг математика ЕГЭ-зин дужааган

Тываның школаларында күрүне шылгалдаларының кол үе-чадазы доозулган.  

ТР-ниң Өөредилге болгаш эртем яамызы ооң баш бурунгаар түңнелдерин үндүрген. Эрткен чылдың түңнелдеринге деңнээрге, шупту эртемнерде ортумак демдек экижээнин специалистер демдеглээн.

Литературага шылгалда дужааган 49 кижиден Тываның күрүне лицейиниң доозукчузу Татьяна Долгова 100 санны алган. Он үш кижи ЕГЭ-ге 60-дан өрү, а дөрт кижи 80-ден өрү санны алган. 

Математикага чаңгыс аай күрүне шылгалдазының профильдиг деңнелин шилип алган доозукчуларның көвүдээни эки көргүзүг дээрзин яамы демдеглээн. Бо чылын профильдиг математика дужааган 1069 кижиниң 215-и ханы билиглиин бадыткаан.  

Математика ЕГЭ-зинде 105 доозукчу 70 болгаш оон өрү саннарны алган. 8 кижи 80-ден хөй санныг болган. Чүгле чаңгыс кижи – Кызылдың президентиниң кадет училищезиниң доозукчузу Святослав Покоянов ханы өөредиглиг математиканың күрүне шылгалдазында 100 санныг түңнелди көргүскен.