Тывада малчыннарның Наадым байырлалының хүннерин тодараткан

Республиканың Чазаа байырлал хүнүн доктааткан. Ол Кызыл – Эрзин автооруктуң 9-ку километринде Тос-Булак деп черге чаңчыл ёзугаар болуп эртер.

 Регион хоойлужудулгазы-биле алырга, Наадым хүннери дыштаныр хонуктар болур. Байырлал хүннери суббота биле улуг-хүнде капсырлажы бергени-биле, ол хүннерни понедельник биле вторникче, азы июль 15 база 16-же чылдырган. Наадым байырлалының ачызында республика чай ортузунда узун дыштаныр хонуктарлыг апарган. 

Тыва малчыннарның Наадым байырлалы спортчу болгаш культурлуг хемчеглер-биле байлак. Тыва хүреш маргылдаазынче Моолдуң шыырак мөгелерин чалаан, аът чарыжының база ча адарының мөөрейлери хөйнү хаара тудар.

 Оон аңгыда республика найысылалынга база ону долгандыр девискээрлерге он-он шөлдерни Наадым хемчеглеринге белеткээр. Республиканың аалчылары концерт залдарынга, ажык сценаларга Тываның тулган дээн чогаадыкчы коллективтериниң, делегейде ады-сураа алгаан сыгытчыларның, хөөмейжилериниң оюн-көргүзүүн көөр.  

Тос-Булактың ховузунга малчыннарның өг хоорайжыгажы, тожу ивижилериниң тос чадырлары-биле кады чаттылдыр чыскаалыптар. Туристер ажык дээр адаанга “музейден” көшкүн Тываның бот-тускайлаң культуразын, араттарның бүдүрген тыва чемнерин, хол-биле кылган эт-херекселдерни көрүп болур.