Тываның Баштыңы Россияның саң-хөө сайыды Антон Силуановтуң хуралында киржип турар

"Делегей кооперациязы болгаш экспорт", "Күш-ажылдың бүдүрүкчүлүү болгаш ажылче хаара тударын деткиири”, “Биче болгаш ортумак сайгарлыкчы чорукту деткиири” деп үш национал төлевилелдер күүселдезиниң айтырыгларын сайгарган хуралда Тываның Баштыңы Шолбан Кара-оол киржип турар.  

Ук хурал Новокузнецк хоорайда, Россия Чазааның даргазының бирги вице-премьери, саң-хөө сайыды Антон Силуановтуң даргалаашкыны-биле болуп турар. Экспорт, ажылчын олуттарның бедик бүдүрүкчүлүү база биче бизнести хөгжүдер национал төлевилелдерни чугаалашкан.

 Сибирьниң Каайлы эргелелиниң медээзи-биле алырга, Тывада экспорт 2013 чылда 200 муң доллар турганындан 586 катап өзүп, 2018 чылда 117 млн. доллар четкен. Аңаа даянгаш, амгы үениң каайлы терминалын тудуп, кызыгаарны ажыдары чугула деп, Шолбан Кара-оол санап турар.  

«Оларны кылыптар болза, Тываже экспорт агымы каш катап улгады бээринге бүзүрээр мен. Республикада 20 муңдан хөй кижи, оларның чартык кезии бүдүрүлге адырынга ажылдап, регионда ортумак шалыңдан хөй акша-шалыңны ап эгелээр. Беш чыл бурунгаар ол элээн эвээш турду. Эки бурунгаарлаашкынны быжыглап алыры-биле, бедик бүдүрүлгелиг ажылчын олуттарны деткээн тускай федералдыг программаларже бистиң бүдүрүлгелеривисти киирерин чедип алыр. Ону кылырда шилилдениң негелдезин өскертир херек. Чогуур саналдарны белеткеп алдывыс. РФ-тиң Чазааның даргазы Д.А. Медведевтиң республиканың социал-экономиктиг хөгжүлде планының талазы-биле сайгарылгалыг аңгы хуралында Тываның инициативаларын деткиирин үени ажыглап, Антон Германовичиге бодум чедирер мен” – деп, Тываның Баштыңы тайылбырлаан.  

Тываның Баштыңындан аңгыда, РФ-тиң президентизиниң Сибирь федералдыг округда бүрүн эргелиг төлээзи Сергей Меняйло, Кемерово, Новосибирск, Томск областарның, Алтай крайның, Хакасияның база Алтайның баштыңнары, Экономиктиг хөгжүлде, Үлетпүр болгаш садыг яамыларының төлээлери, МСП, РЭЦ, ФЦК корпорациялар, СФО-нуң сайгарлыкчылары ол хуралда киржип турар. Ужуражылга үезинде МСП бизнес-навигаторнуң сервистерин, ол ышкаш биче болгаш ортумак сайгарлыкчы чоруктуң инвестиция төлевилелдерин таныштырарын РФ-тиң Саң-хөө яамызының парлалга албаны дыңнаткан.