Тываның Чазаа узун дыштаныр хүннерниң түңнелин үндүрген
13.05.2019
Майның узун дыштаныр хонуктары доозулган. Май 13-те Чазакка эрткен видеоселектор хуралында Май 1 биле 9-туң байырлал хемчеглери организастыг эрттип, хөй чонну – 84700 кижини (бүгү республикада) хаара тутканын дыңнаткан.
Ыдык Бай-Тайганың дагылгазынга 3000 хире кижи чыылган. Планнаттынган хемчеглер үезинде эрткен. Республиканың кожуун, суурларынга 380 культура-массалыг болгаш 125 спортчу хемчеглер болуп эрткен. Кожуун төптеринге байырлал чыскаалдары болган.
Кызыл хоорайда эртип турар шериг чыскаалының шынары чылдан чылче көскүзү-биле экижээн. Чыскаал киржикчилериниң саны немешкен, шериг-агаар күштериниң төлээлери бо чылын бир дугаар киришкен, аъттыг шериглер, демир-орук шериглери чыскаалып алгаш, марштап эрткен. Республика найысылалы Кызылда эртип турар чыскаалдың бир онзагайы – дириг хөгжүм оркестри, аъттыг рота, Үрер хөгжүм оркестринде, оларны кадагалап, ам-даа сайзырадыр херек.
Республикада калбарган аныяктар организацияларының волонтер шимчээшкининиң буянныг үүле-херектери көвүдээн – Ада-чурттуң улуг дайынының киржикчилериниң хөөрлерин аштап-арыглап, чаагайжыдарындан эгелээш, хоочуннарга дузалажып турар. “Энерелдиг чүректер”, “Тиилелгениң волонтерлары”, волонтер-эмчилер шимчээшкиннерин онзалап айтып болур. Республикага эрткен Тиилелге чыскаалында 3617 кижи “Өлүм чок полктуң” одуруу-биле эрткен, оларның 1400-зү – Кызыл хоорайга.
Возврат к списку
|