Тываның биче комплектилиг школаларынга көжүп чоруур лабораторияларны ажыглаар

Яамы лаборатория кылдыр ажыглаарынга УАЗ-2206 микроавтобусту садып алыр дилегни чазакче киирген. Химия, биология база физикага практиктиг кичээлдер эрттиреринге чугула херекселдер-биле чепсегленген лаборатория Чеди-Хөл кожуунда биче комплектилиг 5 школаны хандырар. Ол школалар автолабораторияга кичээлдерни эрттирериниң үезин таарыштыр планнаар ужурлуг.  

“Бистиң өөредилге яамызының физика, химия база биология кичээлдеринге көжүп чоруур лабораторияны ажыглап көөр дээн шенелдезин деткидим. Тускай эртем башкылары база ындыг дериг-херекселдер чок школаларны хандырары-биле лабораториялыг машинаны чепсеглээрин шиитпирлээн. Дугуй кырынга лабораторлуг кичээлдерни эрттирип эгелээр бис. Чамдык көдээ школаларда өөреникчилер өөредилге программазы езугаар ажыглаар херекселдерни көрбээннер. Чижээ, микроскоп азы амперметр деп чүл, оларны каяа ажыглаарыл, химиктиг дуржулгаларны канчаар кылырын билбестер. Ол физика, химия база биологияга ЕГЭ-зиниң түңнелдеринге улуг салдарлыг. Оолдар ол эртемнер-биле холбаалыг мергежилдерни шилип алырынга херек. Ол дээрге республикага чугула херектиг мергежилдер - инженерлер, агрохимиктер, технологтар, фармацевтер, экологтар-дыр. Бөгүнде фермер кижи бодунуң херээн шуудадып, амгы үениң технологияларын ажыглап, бизнезин калбартыр дизе, биологияның эге билиглери чокта, чүү-даа болдунмас. Амдыызында көжүп чоруур лаборатория-биле шенээшкинни Чеди-Хөл кожууннуң 5 школазынга эгелээр бис. Ажылдаарының чурумун хевирлээш, эки түңнелдерни алыр болза, бо эгелээшкинни улаштыр шимчедип болур” – деп, Шолбан Кара-оол ТР-ниң Өөредилге яамызының эгелээшкининге үнелелди берген.  

Россияның чырыдыышкын яамызы Тываның көжүп чоруур лабораториялыг төлевилелин сонуургап турарын демдеглезе чогуур. Федералдыг ведомство ооң дугайында информацияже кичээнгейни угландырар дээш, чурттуң регионнарында бодунуң каналдарында ону тараткан. Төлевилелдиң авторлары – ТР-ниң Өөредилге болгаш эртем яамызының специалистери ооң талалакчылары барын дыңнаткан. Кожа-хелбээ Бурятияда лабораторлуг дериг-херекселдер чедишпес школалар дугуйлуг лабораторияны организастаар бодалдыг.