Тывада девискээрлерни чаагайжыдар часкы субботниктер эгелээн

Республика Баштыңы Шолбан Кара-оол коммунал ажылчыннарның “холу четпес” хоорай болгаш суурлар кыдыы черлерге ажылдаарын чаңгыс чер-чурттугларынга сүмелээн. Республика чурттакчыларының ыдыктап алган черлери – арт-сыннарга, суг баштары дээн ышкаш девискээрлерни кичээнгейге ап, аштап-арыглаарын база саналдаан.  

«Театр тон азардан эгелээр дээр, а хоорай – ооң адын сиилбээн бижик азы тураскаалдан. Ынчангаш бистиң муниципалдарывыска ажылды оон сегирип алырын сүмелеп тур мен. Дыка хөй черлерниң адын бижээн дозулары оңгулап каан, ужар чеде берген. Чүү дарганың бажынга бедигээш черлерге бок төгери кирип келген чүве, чурттакчылыг черже кирип олура, опейтир төп каан боктарны көөрге, чаржынчыы аажок. Ындыг черлерни арыглап аштаарынга хөй чарыгдалдар, хөй кижи-даа херек чок, харын-даа ону аштап-арыглап алырга чонга-даа эки.  

Арт кыры дээн ышкаш, езулалдар кылыр ыдык черлер бар. Сарыг шажын езу-чаңчылдарынга дүүшпес, дириг ыяшка кадак баглаар езулал бар апарган-дыр. Кожавыс моолдар ол айтырыгны шиитпирлеп апкан, кадак баглаар тускай черлерни аңгылап каан, өң-чүзүнү чиде бергеннерин адыргаш, чок кылып турар. Кижилерниң сагыш-сеткилинге-даа, оран-таңды ээлеринге-даа эки кылдыр, арттарны аштап-арыглаарынга чеди хонук чедер боор деп бодап тур мен” – деп, республика баштыңы чугаалаан.