Тываның Баштыңы хоойлуга чөрүштүр арага саарылгазынга удур кады демисежирин Хакасияның чаа удуртукчузунга саналдаан
19.11.2018
Тываның эрге-чагыргазы кожазы Хакасия-биле каттыжып алгаш, арага болгаш спирт холуксаалыг продукцияны хоойлуга чөрүштүр садып-саарарынга удур демисежир.
Республика Баштыңы Шолбан Кара-оол ол угланыышкынга кады ажылдаарын саналдаан чагааны Хакасияның чазааның даргазы болур коллегазы Валентин Коноваловче чоруткан. Ында ийи регионну тудуштурган ийи авто-оруктуң бирээзи – А161 «Абакан – Ак-Довурак» оруун онза хыналдадага алыры чугула деп айыткан.
«Шагдан бээр бистиң республикаларның аразында кожа-хелбээ найыралдың харылзаалары тургустунган, садыг-экономика, культура болгаш үениң чугула өске-даа айтырыгларында демниг болгаш үре-түңнелдиг ажылдап чоруур. Арага болгаш спирт холуксаалыг продукцияны чажыт садып турары-биле демисел - Хакасия биле Тываның тускай структураларының калбак болгаш харылзаалыг ажылы негеттинип турар айтырыгларның бирээзинге хамааржыр» -деп чагаада бижээн.
Тываже киир сөөрткен шынар чок арага продукциязы А-161 автооруктап кирип турарын Шолбан Кара-оол дыңнаткан. Республика бодунуң талазындан транспорт аймаан доктаамал хынап турза-даа, Тываже киир сөөрткен контрабанда араганың хемчээли-даа, семээшкиннерниң саны-даа эвээжевейн турар. Регионнуң Иштики херектер яамызының сан-чурагайы-биле алырга, чүгле бо чылын безин ол оруккка 26 тонна ажыг чажыт араганы хавырган.
Чажыт арага бизнези бодун долгандыр кем-херек бөлүктерин хаара тыртnып алыры-биле криминогенниг байдалды улам нарыыдадыр деп, республика баштыңы санаан. Полицияның көжүп чоруур постуларын оюп чорааш саткан контрафакт водка регионда кем-херек үүлгедиишкининге багай салдарны чедирип турар.
«Хүндүлүг Валентин Олегович, арага болгаш спирт холуксаалыг продукцияны чажыт садып-саарарынга удур кады хөделип, демисежир сорулга-биле А-161 авто-орукту шыңгыы контрольга алыр немелде хемчеглерниң аргазын көөрүн Силерден диледим» - деп, Тываның Баштыңы коллегагазындан дилээн.
Шолбан Кара-оол соңгулдаларда тиилелгези дээш Валентин Коноваловка байырын чедиргеш, регионнуң чидиг айтырыгларынче ооң чаа көрүжү болгаш тура-соруу Хакасияның социал-экономиктиг хөгжүлде айтырыгларын чедиишкинниг шиитпирээр арганы черле бээр деп демдеглээн.
Возврат к списку
|