Тываның Баштыңы миграция-виза албанының чаа оран-савазын тудар планны чугаалаан

Россияның Иштики херектер яамызы, Кызылда Ленин кудумчузунда чер участогунга, миграция-виза албанының чаа оран-савазын тудар арганы ол черинге өөренип көөр ажылчын бөлүктү чорудар деп турар. Тываның Баштыңы Шолбан Кара-оол Москвага сөөлгү сургакчылаашкынының үезинде ол дугайында дугуржулганы чедип алган.  

«Кажан миграция-виза албанының оран-савазын тудар акша бар деп чугаалаарга, республиканың найысылалынга кайы хире чараш тудугну тудуп алырывысты бодапкан мен – деп Шолбан Кара-оол дыңнаткан. – Хоорайның төп кезээн эрги бажыңнар дола берген турда, кыйыг черге Дээди Судту тудуп каан ышкаш чүүлдү катаптаар хөңнүм чогул».  

Тываның Баштыңы республика шагда-ла аңаа белеткенип турганын айыткан. «Федералдыг инвестицияларга черни аңгылап, эмнелгени үезинде ап каапкан бис. Херек кырында ону тускайлаары база амыр эвес, Ленин кудумчузунда чер участогун хоойлу нормалары база негелделери езугаар федералдыг өнчүже дамчыткан».  

РФ-тиң иштики херектер сайыдының бирги оралакчызы Александр Владимирович Горовой Тывага кээп чорааш, аңгылап каан чер Чазактан ырак эвес черде, хоорайның төп кезээнде чыдарын көрген. «Москвага сөөлгү сургакчылаашкыным үезинде, ону ажыглап, кирдим. Ол мени тыл хандырылгазы болгаш тудуг талазы-биле бодунуң оралакчызынга таныштырган, бир эвес силер аңаа туттунуп шыдавас болзуңарза, ол участокту дедир ап болур бис, деп бодумнуң туружумну илереттим» – деп Шолбан Кара-оол чугаалаан.  

Бо чооку үеде ИХЯ Россияның ИХЯ-зындан ажылчын бөлүк кээр деп турарын Тываның Баштыңы демдеглээн. «Миграция-виза албанынче оочур чамдыкта кудумчуже үне берген турары, чөптүг эвес. 2019 чылда чаа оран-саваны тудуп, онзагай болуушкун апаарынга идегеп турар мен. Бир эвес ол туттуна бээр болза, амгы үеде чуртталга бажыңының бирги каъдында сыңмарлашкан албанның ажылынга таарымчалыг байдал тургустунар» – деп, Шолбан Кара-оол айыткан.