Тывада чурттакчы чонну гриппке удур тарыыры адакталган

Эмчи ажылдакчылары тарылга кампаниязының эң-не идепкейлиг киржикчилери болуп, планны 100,3 хуу, азы 29 кижиге ажыр күүсеткен. Өөредилге ажылдакчыларын 99,9 хуу, студентилерни, 60 хардан өрү назылыгларны, садыг, ЧКА, ниити чемнелге, транспорт ажылчыннарын база малчыннарны 100 хуу тараан. 50500 өөреникчини тарыыр тургаш, 50890 кижини тарып, планны 101,6 хуу күүсеткен.

Сезоннуг грипптээшкинден камгаланыр эң дээштиг арга – тарыышкын болурун сагындыраал. Бүгү-делегейниң кадык камгалал организациязының сүмелээни езугаар, тарыыр бүдүмелдиң тургузуунче болур халдавыр сезонунуң грипп вирузунуң штаммын киирген. Бо чылын ол штамм бо: A/Michigan/45/2015 (H1N1) pdm09, A/Singapore/INFIMH-16-0019/2016 (H3N2) и B/Colorado/06/2017 (линия B/Victoria/2/87).  

Гриппээри иммунитетти кошкадыр болгаш, хоочураан база тыныш органнарының аарыгларынга дээр. Ынчангаш тарылга салдырып алырындан аңгыда, бодун болгаш хөй-ниити черинге арыг-силигни тудуп, организмниң халдавырлыг аарыгга удур демисежир аргазын быжыглаар.  

Эрткен неделяда, республикада ОРВИ-ден аарыыры 10 муң чурттакчыга онааштыр 30,1 болуп, 983 кижи аараан. Ийи харга чедир уруглар ортузунда 431 кижи аарып, көргүзүг талазы-биле эң хөй болган. Ынчангаш ол хире назылыг чаштарже онза кичээнгейни салыр. Неделя дургузунда 70 кижи эмнелгеже кирген, оларның 60-ы – 14 харга чедир уруглар. Кызылда ОРВИ-ден аараан 571 чорук демдеглеттинген. 29 кижини чыттырып эмнээн, ооң санында 20 бичии чаштар бар. 

Росхереглекчилер хайгааралының Тыва Республикада эргелели-биле ТР-ниң Кадык камгалал яамызының кады кылган дужаалы езугаар, аараан кижилерде грипп халдавырының барын хынаары-биле биологтуг материалды лабораторлуг шинчилгеже чоруткан. Сентябрьның 1-ден 890 лабораторлуг шинчилелди кылган, гриппке хамаарышпас 51 чорук бүрүткеттинген.