Тываның Баштыңы республиканың ажыл-ишчилеринге күрүне шаңналдарын тывыскан

Тываның Национал театрынга, Республика хүнүнге тураскааткан байырлалда күрүне шаңналдарын тывыскан.  

Тываның Баштыңы Шолбан Кара-оол чыылганнарга күрүне байырлалы-биле байырны чедирип, Дээди Хуралдың даргазы Каң-оол Даваа база кол федералдыг инспектор Александр Вавилихин олар-биле кады, ажыл-ишчилерге күрүне шаңналдарын тывыскан.  

«Тыва Республиканың өөредилгезиниң алдарлыг ажылдакчызы» хүндүлүг атты «Дыңнавас уругларга школа-интернат» Тыва Республиканың күрүнениң ниити өөредилге бюджет албан чериниң дефектолог башкызы Камзай-оол Клара Донгаковнага (1948 чылда төрүттүнген) тывыскан. 

«Тыва Республиканың кадык камгалалының алдарлыг ажылдакчызы» хүндүлүг атты «Барыын-Хемчиктиң кожууннар аразының медицина төвү» Тыва Республиканың күрүнениң кадык камгалал бюджет албан чериниң травматология салбырының травматолог-ортопед эмчизи Хомушку Маадыр-оол Сурунович (1957 чылда төрүттүнген) тывыскан.  

«Тыва Республиканың кадык камгалалының алдарлыг ажылдакчызы» атты 2012 чылда алган, «1 дугаар республика эмнелгези» Тыва Республиканың күрүнениң кадык камгалал бюджет албан чериниң травматология салбырының травматолог-ортопед эмчизи Чадамба Эргил Доржуевич (1964 чылда төрүттүнген) «Тыва Республиканың улустуң эмчизи» атка төлептиг болган. 

«В. Көк аттыг Тыва Республиканың Национал хөгжүм-шии театры» күрүнениң бюджет албан чериниң артизи Сат Саяна Дугер-ооловнага (1971 чылда төрүттүнген) «Тыва Республиканың улустуң артизи» атты тывыскан.  

Тожу кожууннуң «Өдүген» муниципалдыг унитарлыг бүдүрүлгениң ивижизи Орай-оол Олег Бараанович (1954 чылда төрүттүнген) «Тыва Республиканың көдээ ажыл-агыйының алдарлыг ажылдакчызы» хүндүлүг атты алган. 

Улуг-Хем кожуун чагыргазында хоочуннарның хөй-ниити чөвүлелиниң база «Ак баштыглар» ансамбльдиң удуртукчузу Данзын-оол Дадар-оол Севеновичиге (1933 чылда төрүттүнген) «Буян-Бадыргы» орденниң II чергезин тывыскан. Ол «Күш-ажылчы шылгарал» (1976 ч.), «Шылгараңгай күш-ажылы дээш» (2013 ч.) медальдарның, « «Буян-Бадыргы» орденниң III чергезиниң (2015 ч.) эдилекчизи. Ооң аңгыда «Тыва Республиканың алдарлыг ажылдакчызы» (2011 ч.) хүндүлүг аттыг. Ниити күш-ажыл стажы – 68 чыл. Албан стажы – 8 чыл. 

Тыва Республиканың Дээди Хуралының (парламент) депутады Оюн Василий Майлолович (1964 чылда төрүттүнген) «Буян-Бадыргы» орденниң III чергезиниң эдилекчизи болган.