РФ-тиң Президентизиниң «чаа» май чарлыктарын боттандырар төлевилелдерни Тывада ажылдап эгелээн

Регион чазаа, Президент чарлыы езугаар, нормативтиг эрге-хоойлу баазазын чаартыры көрдүнген национал төлевилелдерни боттандырар талазы-биле ажыл-чорудулгалар планын база регион төлевилелдерин хевирлээр ажылды калбарткан. 

«РФ-тиң Президентизиниң чаа май чарлыын боттандырар ужурлуг национал программаларже Тываның төлевилелдерин киирер дээш, федералдыг чазакка бистиң сайыттарывыстың хайымныг ажылы эгелээн. 2019 чылда Тываның бюджединиң хемчээли, бистиң экономикавысче күрүне инвестицияларының масштавы, а ооң төнчү түңнели – республика хөгжүлдезиниң темпизи, салыышкыннарже ону хаара тутканының өзүлдези хамааржыр. Бөгүнде федералдыг дузаламчыга бистиң хереглелдеривисти, бирги ээлчегде инфраструктура төлевилелдерин, туруштарын, көргүзүглерин чөпшээрежири чоруп турар. Ол бүгүдеге 2 ай бердинген, октябрь 1-ге чедир шупту программаларны киирер. Биске чедиишкиннерни күзеңер, чаңгыс чер-чурттуглар!» - деп, Шолбан Кара-оол бодунуң блогунда бижээн.  

Президент 12 угланыышкынга национал төлевилелдерни регионнар-биле кады ажылдап кылыр даалганы РФ-тиң Чазаанга бергенин сагындыраал. Ооң аразында – демография, кадык камгалалы, өөредилге, чурттаар оран-сава болгаш хоорай хүрээлели, экология, айыыл чок болгаш шынарлыг автооруктар, күш-ажылдың бүдүрүкчүлүү база чонну ажылга хаара тударын деткиири, эртем, сан-чурагайлыг экономика, культура, биче болгаш ортумак сайгарлыкчы чорук база хуу сайгарлыкчы эгелээшкинни деткиири, делегей кооперациязы база экспорт бар. Тываның эрге-чагыргазы президент чарлыы-биле, республиканың транспорт чедингирин улгаттырар база инвестиция хаара тудуушкунунче угланган инфраструктура төлевилелдеринге бодунуң ажыл-чорудулгазын күштелдирер. Республика оон аңгыда, чурттаар оран-сава база социал объектилер тудуунче, сайгарлыкчы чорукту хөгжүдер адырже күжениишкинни улгаттырар планныг.