Тываның аныяк малчыннарын деткиир «Экономиктиг десант» ажылдап эгелээн

«ТР-ниң Бизнес-инкубатору» КБА-ның экономистери база ТР-де федералдыг үндүрүг албаны эргелелдиң күрүнениң кол үндүрүг инспектору кирген «Экономиктиг десант» Тожу кожуунга бирги үнүүшкүннү организастаан. Т

ожу – Кыдыкы Соңгу чүк районнарынга деңнештирген, Тываның эң ыраккы кожууннарының бирээзи. «Экономиктиг десант» бөлүк бо кожуунда кыштагжылар чок-даа болза, тараачын-арат ажыл-агыйларының баштыңнары база сайгарлыкчылар-биле ужурашкан. Шуудаан болгаш эгелеп чоруур сайгарлыкчыларга, тараачын-арат ажыл-агый баштыңнарынга отчет тургузарынга, үндүрүг инспекциязынче декларация дужаарынга, бизнес план кылырынга, ол ышкаш бухгалтер, экономика айтырыгларынга тайылбырларны берген.  

«Ивижиниң өг-бүлезинге эт-херексел» губернатор төлевилелиниң киржикчилериниң бирээзи Ензак Чинчи Юрьевна тараачын-арат ажыл-агыйын ажыдарынга, чаңгыс аай көдээ ажыл-агый үндүрүүнге үндүрүг отчедун дужаарынга, камгаладылга дадывырларын төлээринге тайылбырны алган. «Ивижиниң өг-бүлезинге эт-херексел» губернатор төлевилелиниң утказы – бүдүн чылда малы-биле тайгада көжүп, ивилер азырап-өстүрүп турар тус черниң тожу тываларының өг-бүлелерин деткип, оларның амыдыралын чиигедири болуп турар. 

Тожу кожуунда хаваннар база инектер өстүрер талазы-биле мурнуку одуругда, тараачын-арат ажыл-агыйның баштыңы Долгих Сергей Юрьевичиниң фермазынга чорааннар. Сергей Юрьевич көдээ ажыл-агый бүдүрүлгезинде бедик бүдүрүкчү көргүзүглери дээш чаңгыс эвес удаа шаңналдарны алган. Тожу кожуунда сүт продукциязының бүдүрүлгези чок болганы-биле, ажыл-агыйны калбартырының, сүт цегин ажыдарының планын чугаалажып көргеннер. 

«Экономиктиг десант» командазы арат Догдугаш Геннадий Коловичиниң аалынга база барганнар. Хууда дузалал ажыл-агыйының баштыңы Г.К. Догдугашта 20 баш инек бар. Ферманы улгаттырар айтырыгны, мал чеминиң белеткелин база чугаалашканнар.  

«Экономиктиг десант» төлевилел күүселдезиниң кол угланыышкыннарының бирээзи – ыраккы кожууннарга тараачын-арат ажыл-агыйының таарымчалыг болгаш турум сайзыралын чедип алырынга байдалдарны тургузары болур.