Тываның Баштыңы ПКУ-же оолдар шилилдезин организастаар айтырыгны бодунуң оралакчыларының бирээзинге быжыглаар даалганы өөредилге сайыдынга берген

 «Президентиниң кадет училищези – кандыг-даа школа азы лицей-биле дөмейлешпес, бисте онзагай өөредилге чери деп, кезээде чугаалап турар мен. Училищеже кирер оолдар шилилгезинге бедик статуска дүгжүп турар онза негелде турарын негеп келдим. Маңаа тергииннерниң тергииннери, эң салым-чаяанныглар база чүткүл-соруктуг оолдар боорда, күрүнеден деткимче болгаш сагыш човаашкын херек кижилер өөренир ужурлуг. Бирги ээлчегде өскүстер, чедимчелиг үе-чергезинге бодаарга, эки эртем-билиг чедип алыр арга-шинээ чок, хөй ажы-төлдүг өг-бүлелерден оолдар, уруглар кирер ужурлуг. Шилилдени ынчаар чорудары-биле, училищеге өөренир күзелдиг оолдар, уругларның аразынга шынчы, өнңүк-тала тыртпас конкурсту эрттирер. Баштай школа деңнелинге, оон кожуунга. Шилилдени эрткен шупту кордакчылар, арга-дуржулгалыг башкыларның удуртулгазы-биле, училищеже дужаап кирер шылгалдалар мурнунда шыңгыы белеткел курстарын эртер. Чүгле ындыг шилилде системазын ажылдадып, ПКУ-ниң сургуулдарындан угаанныг, кандыг-даа шыырак дээди өөредилге черин доозуп алгаш, профессионалдар апарып, төрээн Тывазының идегелдиг чөленгиижи кижилер үнеринге 100 хуу бүзүреп болур. Кожуун чагыргалары, оолдарны хүлээп алырын харыылап турар кижилер, ажы-төлдүң салым-хуузу дээш бүгү талазы-биле харыысалгазын медереп билген турар ужурлуг. ПКУ-же оолдар шилилдезин организастаар айтырыгны бодунуң оралакчыларының бирээзинге быжыглаар даалганы өөредилге сайыдынга бердим. Ол кижилер-биле дорт ажылдап, конкурстуң чурумун бүгү деңнелдерге хүлээп алырын база ооң шак ышкаш ажылдап турарын чедип алыр мен» - деп, Тываның Баштыңы Шолбан Кара-оол бодунуң блогунда бижээн.