Тывада «Шериг ралли» бүгү-армейжи конкурс эртип турар

"Кызылдың Арат шөлүнге, конкурстуң байырлыг ажыдыышкын үезинде, тускай участок көргүзүг маршрудунуң киржикчилеринге стартты берен. Шериг албанныглар Тывада маргылдааларның аалчыларынга амгы үениң техниказын, боо-чепсекти, ужудукчу чок ужар аппараттарның делгелгезин организастаан» - деп, парлалга албаны чугаалаан.  

Делегейниң армейжи оюннары-2018-те Россияны төлээлээр эрге дээш шупту округтарның болгаш флоттарның шериг чолаачылары чаржыр. "Шериг ралли" конкурска киржир тергиин дээн экипажтарны шилээн. Тыва Республиканың карак четпес делгемнеринге олар боттарының мергежилин көргүзерлер. Кара-Хаактың даглыг полигонунда бистиң шериг автомобиль техникавыстың шыдамыын көргүзер ниитизи-биле 142 км узун орукту тускай кылган» - деп, Төп шериг округунуң шериг командылакчызы, генерал-лейтенант Александр Лапин чугаалаан. 

Чепсеглээшкинде российжи шериг автомобиль техниказы маргылдааларда киржир.  

"Ол дээрге 4х4 база 6х6 дугуйларлыг «КамАЗ" биле "Урал" автомобильдер-дир. Төп шериг окрузунуң дайынчыларында күрүнениң камгалал чагыы-биле бо чылдың эгезинде кирген "Тигр-М" куяк автомобильдер бир дугаар киржир. Амгы үениң машиналарының экипажтары кылымал болгаш езулуг шаптараазыннарлыг черлерлиг оруктап дүрген халдырынга мөөрейлежирлер» - деп, ол тайылбырлаан.

"Шериг ралли - 2018" конкурстуң маргылдаалары Кара-Хаактың даглыг черлеринге июнь 9-ка чедир болуп эртер. Делегейниң армейжи оюннарының маргылдаалары ийи дугаар чыл эртип турар, 2017 чылда Россияның мурнуу чүгүнде үш регионга - Астрахань, Волгоградь областарга база Калмыкияга оруктарны кылган турган.