Тывада «Энергострой» компания аварийлиг чуртталга бажыңнарындан өскээр көжүрер программа-биле 4 бажың тудуун доозуп турар

Чурттакчыларга чаа тудугларның таарымчалыын "Тува 24" телеканал демдеглээн: каш базым черде хоорай поликлиниказы, 11 дугаар школа база өске-даа социал инфраструктура объектилери бар.  

Дружба кудумчузунда 26, 28, 30 база 32Б дугаарлыг бажыңнарже аварийлиг чуртталга бажыңнарындан хамаатыларны өскээр көжүрер программаның 2014, 2015 база 2016 чылда күүселдезиниң киржикчилери көжүп кирер. 

Аварийлиг чуртталга бажыңнарындан хамаатыларны өскээр көжүрер программаны күүседир дээш, ниитизи-биле 4 муң ажыг дөрбелчин метр шөлдүг, 115 чурттаар черлерни садып алыр 4 керээни «Энергострой» тудуг организация-биле чарган. Кызыл хоорайның мэриязынче оларны улаштыр дамчыдар дээш, өнчү эргезин тургускан документилерни долдурар ажылдарны ам кылып турар. Аңгы-аңгы черлерде турар аварийлиг 26 бажыңдан 115 өг-бүле ынаар көжер» - деп, ТР-ниң Тудуг болгаш ЧКА яамызының ЧКА килдизиниң начальниги Рина Монгуш «Тува 24»-ке тайылбырлаан.

 30 база 32А дугаарлыг, 30 квартиралыг ийи бажыңның документилерин долдуруп турар. Бажыңны ажыглалче киирер мурнунда кылыр сөөлгү ажыл ол. Объектилерни чылыг хандырылгазынга кошкан.  

"Ийи бажың белен. 30 биле 32Б дугаарлыг бажыңнарның шеверлел ажылдары доозулган. А 26 биле 28 дугаарлыг бажыңнарда иштики база сантехниктиг ажылдар кидин түлүк. Малярлар, штукатурлар, электриктер, сварщиктер дээш, 75 кижи ажылда. Бажыңнар чоогунуң чаагайжыдылгазын база ногаажыдылгазын чергелештир кылып турар. Керээде кирген инженер четкилериниң талазы-биле бир берге чүүл – поликлиника девискээринде чылыг четкизиниң участогу. Чылыг четкизин эде кылып турарындан, чылыг шугумунга коштунуп чадап тур бис. Бистиң бажыңнарывыс поликлиника, уруглар сады-биле тудуш. Поликлиника база уруглар садының удуртулгазы-биле чугаалашкан бис, дыштаныр хонуктарда, ийи-үш хүн чылыгны өжүргеш, чылыг шугумун солуптар дээривиске, олар чөпшээрелин берген, ам Кызылдың ЧЭТ-биле айтырыгны шиитпирлээр» - деп, "Энергострой" КХН-ниң кол инженери Сергей Крапивин чугаалаан.

Кызылдың ЧЭТ удуртулгазы-биле чугааларны чоруткан, чылыг хандырылгазынга коштунарының айтырыы онза хыналдада. 

115 квартираны садып алырынга 167 млн. рубль хире акша үнгенин Тываның тудуг яамызы дыңнаткан. Ооң 144,5 млн. рубли ЧКА-ны эде чаартыр деткимче фондузундан, а 22,6 млн. рубли республика бюджединден үнген.