«Тыва Экспо-2018. Час» регионнар аразының делгелге-ярмаркада бараан саарылгазының ниити түңү 23,5 млн. рубль болган

«Тыва Экспо-2018. Час» регионнар аразында ажыл-агыйжы шөлчүгеш 89 киржикчини хаара туткан. Тыва Республиканы – 42, Россияның регионнарын 18 киржикчи төлээлээн. Сайгарлыкчы чорукту деткиир 14 инфраструктура организациялары боттарының ажылын чоруткан. Делгелгеге киржир күзелдиг сайгарлыкчыларның хөй болганы-биле, И.Ярыгин аттыг спорт комплекизиниң баарынга садыглаар майгыннарны тургускан. Делгелге садыглаашкынның соонда, эң-не шылгараан киржикчилерге дипломнар болгаш тураскаал суй-белектерни тывыскан.  

Тывада Россияның Сайгарлыкчы чорук неделязы делгелге-садыглаашкын-биле доозулган. Моолдуң сайгарлыкчыларының киржилгези-биле «Увс аймакка кылган» деп булуң делгелгеде онзагай черни ээлээн. Аңаа харыы кылдыр, «Тыва Экспо-2018. Час» делгелге чорудуу-биле, Моолдуң Убсанур биле Завхан аймактарының кызыгаар ярмаркаларынга Тыва Республикадан сайгарлыкчыларның киржирин дугурушкан. 

Каа-Хем кожуундан сайгарлыкчы Семен Бочкарев тудуг материалдарын делгеп, садып алыкчылар-биле, Моолдан база, харылзааны тыпкан. Кызыл кожуундан «Заря» агрохолдингизи делгелге-садыглашкынга идепкейлиг киришкен. Агрохолдингиниң салбыры Моолдуң Убсанур аймаанче куш эъдин болгаш чуургаларын сөөртүп эгелээр.  

«Тываның бойдузунуң белээ» экспозицияны аңгы демдеглеп болур. «Вавиол» КХН республика девискээринде болгаш оон дашкаар эң хереглелдиг эм оъттар продукциязын делгээн. З.С. Хомушкунуң хуу бүдүрүлгези чыжыргана үзү биле сировун, а барыын-хемчикчилер черлик кулчаның соктаан бажын садып алыкчыларга сүмелээн. Чаа-Хөл кожуундан сайгарлыкчы савалаан «Ажыг-Суг» аржаанын саткан. «Туранның сыын ажыл-агыйы» күрүнениң унитарлыг бүдүрүлгези сыын мыйызындан продукциязын делгээн. 

Кызыл, Улуг-Хем, Чаа-Хөл, Бии-Хем, Таңды, Кызыл кожууннардан бараан бүдүрүкчүлери делгелгеге эң идепкейлиг киришкен. Көдээ ажыл-агыйның хоочуну, «Мөген-Бүрен» КУБ-туң директору Өшкү-Саар Аракчааевна Ооржактың удуртулгазы-биле, эң-не ыраккы Мөңгүн-Тайга кожууннуң төлээлери делгелгениң шупту хүннеринде ажылдаан. 

Бурятия база Красноярск крайдан эккелген өзүмнерни чон хөйү-биле алган. Үш хүн дургузунда 1200 өзүм саттынган. Пөштен доскаар-чунар-бажың биле фурако япон чунар-бажыңны чон дыка сонуургаан. «Пөштен дываажаң» компания чугула инфраструктуразы (оруу, чырыы, херими) бар таарымчалыг бажыңнарны база гриль-бажыңчыгаштарны база саткан. Компания Кызыл хоорайга бодунуң салбырын ажыдар деп шиитпирни үндүрген.  

HYUNDAI биле MITSHUBISHI-ниң албан езузу-биле дилерлери - «Медведь-юг» база «Медведь Холдинг» компаниялар тест-драйв эртер база чиигелделиг өртек-биле Hyundai база Mitsubishi автомобильдиң аңгы-аңгы маркаларын делгээн. Тыва Республиканың чурттакчыларынга август төнчүзүнге чедир тускай акцияны чарлаан. «Газель» автомобильдиң пассажирлер болгаш чүък сөөртүр чаа маркаларын көргүзүг кылдыр делгээн. Хакас Республикада база Красноярск крайда Toyota-ның албан езузунуң дилери хагдынган соонда, HYUNDAI биле MITSHUBISHI автомобильдерни республиканың чурттакчылары хөйү-биле садып ап эгелээнин көргеш, ооң дилерлерни делгелгеде киржип келген. Албан езузунуң дилерлеринден автомобильдерни дорт садып алыры, хереглекчилерге чугула магадылалдарны берип, артык немелде өртектен чайладыр.