Республиканың чурттакчылары «Кемерово, Тыва сээң-биле кады» деп кажыыдал акциязынга киришкен

Бо дидиренчиг болуушкунну сөстер-биле дамчыдары болдунмас. Акцияга киришкен кижи-ле кемеровчуларның кажыыдалын бодунуу ышкаш хүлээп көрген. "Зимняя вишня" садыг төвүнге болуушкунда когарааннарның чоок болгаш төрээн кижилерин деткиир дээш школачылар, ажы-төлүн эдерткен ада-иелер, Тываның 500 ажыг чурттакчылары келген. 

«Найырал» кинотеатрның чанында бичии шахтернуң турускаалының чанынга 18.00 шакта чыглыр дугайында кыйгырыглыг бижик март 27-де, эргенги шакта, социал четкилерге көстүп келген. Хөй-ниити эгелээшкини-биле эрттип турар хемчегни Кызыл хоорай мэриязы деткээн. Тыва Республиканың Чазааның кежигүннери база акцияга киржири чугула деп санаан.

Чамдыктар кажыыдалдың карак чажын тудуп шыдаваан. Берге үеде кемеровчуларга кажыыдалдың сөстерин дыка хөй кижилер дамчыткан. Сактыышкынның бир минутазын чарлаан. Кижилер дириг чечектерни, ойнаарактарны салып, лааларны кыпсып, «Кемерово, Тыва сээң-биле кады» деп плакаттарны туткан. 

«РФ-тиң Президентизиниң Чарлыы-биле март 28-те Национал кажыыдалдың хүнү кылдыр чарлаан, күрүне туктарын бадырып, хөглээшкинниг хемчеглер болбас деп айыткан. Кемерово область-биле кады Тыва ханы кажыыдап тур» - деп, Тываның Баштыңы Шолбан Кара-оол социал четкилерде бижээн. 

Тываның буддийжи болгаш православ хүрээлеринге Кемеровога мөчээн кижилерге шажын номчулгаларын кылган.