Тываның Баштыңы кол яамыларның удуртукчу составын аныяктар-биле быжыглаан

Тываның Чазаа орук-транспорт комплекизиниң сайыдының оралакчызынга чаа томуйлаашкыннарны бадылаан. Тываның Баштыңы Шолбан Кара-оол чогуур доктаалга атты бо неделяда салган.  

Сайыттың орук ажыл-агыйы, тудуу, септелгези, ажаалдазының талазы-биле оралакчызынга Шораан Чыргал-оолду томуйлаан , ол ооң мурнунда яамының аппарадының ол угланыышкын талазы-биле килдизинге начальниктээн. 

Транспорт инфраструктуразын (авиааргыжылга, сөөртүлге, оруктуң айыыл чок чоруун) ам Андрей Конга харыылаар. Яамыже шилчиир мурнунда ол, Тываның Чазааның даргазының бирги оралакчызы - тудуг болгаш чуртталга-коммунал ажыл-агый сайыдының секретариадының удуртукчузунга ажылдаан. 

Олар кайызы-даа аныяк, Андрей Конга чаа-ла 36 харлаан, а Шораан Чыргал-оол 30 хар безин четпээн. Ынчап кээрге, Тываның Чазааның удуртукчу звенозунда ортумак назын ам 43 хар. Кайызы-даа мергежилиниң аайы-биле удуртулга ажылының эки школазын эрткен.

Республика Баштыңы Шолбан Кара-оол шупту деңнелдиң удуртулга органнарынче аныяк специалистерни депшидер дээн тускай сорулгалыг политиканы чорутканы-биле, томуйлаашкыннарны кылган.  

Дээди өөредилге черлериниң доозукчуларынга орукту бээри-биле, Чазак Даргазының саналдааны езугаар, Тыва 2014 чылда, күрүне эргелеп-башкарылга органнарынга албан-хүлээлгеже алырда, стажка квалификация негелдезин Россияда бир дугаар эвээжеткен регион болур.  

Кадрлар курлавырын хевирлээрде аныяктарны хөйү-биле ап турар. Республика Баштыңы 2017 чылды Аныяктарның бот-идепкейиниң чылы кылдыр чарлап, күүсекчи эрге-чагырга органнарының база өске-даа адырларның кадрлар чаартылгазында аныяктарга орукту берген.