Тываның эмчилери МФЦ-ге келген кижилерге консультацияларны бээр

 Тываның хөй ажыл-чорудалгалыг төвүнге күрүне ачы-дузазының порталы таварыштыр хүлээп алыышкынга бижидер дээш келген кижилерге эмчилер халдавырлыг аарыглар профилактиказы болгаш амыдыралдың кадык овур-хевириниң, донор ханын дужаарының, ыжык аарыгларының дугайында арга-сүмелерни бээр. 

Оон аңгыда келген кижилерниң ханының базыышкынын болгаш деңзизин хынап, ыжык аарыгларын эрте чадазында илередири-биле анкетаны долдуртур. Информатизация болгаш харылзаа яамызының тургусканы кол төвүнге эмчилер консультацияларны ынчаар организастаар. Төп күрүне болгаш муниципалдыг ачы-дузаларга хамаарышпас ачы-дузаның санын көвүдедир. Бо төлевилелде эмчи ажылдакчыларының киржилгези республика чонунуң ортузунга аарыыр чорукка удур профилактика ажылын чорудуп, медээлер бээринче хөй кижини хаара тудар ужурлуг деп Кадык камгалал яамызы санап турар. 

Эмчилер консультацияларны неделяда ийи катап эрттирер. Бо чоокку үеде, февральдың 8, 13, 15, 20 база 22 хүннеринде 9 шактан 11 шакка чедир консультацияларны бээр. 

Күрүне ачы-дузазының порталы таварыштыр хүлээп алыышкынынга бижидип келген 2 кижи-биле катай шупту 11 кижи специалистерге кирген. Келген кижилерниң ханының базыышкынын шинчип, арга-сүмелерни берген. Дараазында консультацияда республиканың 1 дугаар эмнелгезиниң специалистери хан базыышкынының дугайында тайылбырны бээр.