31.01.2018
Президент Владимир Путин өг-бүлелерни деткиир болгаш чаш төл төрүттүнеринде идиг бээр хемчеглерни айыткан. Бирги чаш төрүттүнгенде ай санының төлевиринге ол хамааржыр. Оон аңгыда 2018 чылда ие капиталын ажыглаар бир арганы берген. ТР-ниң Өг-бүле болгаш уруглар херектериниң талазы-биле агентилелдиң директору Саида Хертековна Сенгии биле РФ-тиң Пенсия фондузунуң Тывада салбырының удуртукчузу Светлана Караевна Кенден ол чаартылгаларның дугайында "Тува 24" телеканалдың студиязынга тайылбырлаан. Чугааны Азиана Чадамба чоруткан.
— Ай санының 10 муң рубль хемчээлдиг төлевирин кандыг өг-бүлелер алырыл?
Саида Сенгии, ТР-ниң Өг-бүле болгаш уруглар херектериниң талазы-биле агентилелдиң директору:
— Ийе, 2017 чылдың декабрь төнчүзүнде президент Владимир Владимирович Путин өг-бүлелерни деткиир хемчеглерни чарлааны шын. 2018 чылдың январь 1-ден ол хоойлу күш кирген. Федералдыг ол хоойлу езугаар, 2018 чылдың январь 1-ден чаш төлдүг болган азы уруг азырап алган ада-ие азы азыракчылар деткимчениң немелде хемчээлин алыр.
— Деткимчениң ол хемчээлин шупту өг-бүлелер алыр деп чамдыктар будалып турар. Ол ындыг эвес болгай. Ай санының пособиезинче кандыг өг-бүлелер кордап болурун тайылбырлап бериңерем?
Саида Сенгии, ТР-ниң Өг-бүле болгаш уруглар херектериниң талазы-биле агентилелдиң директору:
— Чок, шупту өг-бүлелер эвес, а дун чаш төрүттүнген өг-бүле деткимчени алыр эргелиг. Пособиени чүгле эвээш орулгалыг улус алыр.
-- Өг-бүлениң амыдырап-чурттаарының кудуку хемчээлин канчаар санаарыл?
Саида Сенгии, ТР-ниң Өг-бүле болгаш уруглар херектериниң талазы-биле агентилелдиң директору:
— Хоойлу езугаар өг-бүлениң амыдырап-чурттаарының кудуку хемчээлин санаарда, 2017 чылдың ийиги кварталында республиканың ажылдап шыдаар чурттакчы чонунуң амыдырап чурттаарының эң эвээш хемчээлин көөр. Регионнарда ол түң аңгы. Тывада 10347 рубль акша.
— Бо хоойлуга хамаарыштыр айтырыглар бар, чижээлээрге, Чаа чылга чедир каш-ла шак арткан турда, 2017 чылдың декабрь 31-де божаан иелерден. Оларны киирер болган бе? Пособиеже ынанып болур бе?
Саида Сенгии, ТР-ниң Өг-бүле болгаш уруглар херектериниң талазы-биле агентилелдиң директору:
— Чок. Ынчаар болдунмазы харааданчыг. Федералдыг хоойлу-дур. 2018 чылдың январь 1-ден төрүттүнген азы азырап алган уруглар дээш төлевирни төлээр.
— Аныяк иеден мындыг айтырыг бар. Бирги уруундан ойталааш, авазының адында кылдырткан, ам ийи дугаарын божаан, документ езугаар бирги төлү болур. Пособиени ол алыр эргелиг бе?
Саида Сенгии, ТР-ниң Өг-бүле болгаш уруглар херектериниң талазы-биле агентилелдиң директору:
— Бирги төлүнден ойталааш, ада-ие эргезин казыттырган авалар ук төлевирни алыр эргези чок.
— Ай санының төлевирин алыр дугайында билдириишкинни кайнаар киирерил?
Саида Сенгии, ТР-ниң Өг-бүле болгаш уруглар херектериниң талазы-биле агентилелдиң директору:
— Күш-ажыл болгаш социал политика яамызының девискээр органнарынче, ол ышкаш хөй ажыл-чорудулгалыг төптер (МФЦ) таварыштыр документилерни дужаар.
— Бөгүнге чедир чеже ие ол пособиени алыр дугайында билдириишкин кииргенил?
Саида Сенгии, ТР-ниң Өг-бүле болгаш уруглар херектериниң талазы-биле агентилелдиң директору:
— Республиканың Кадык камгалал яамызының медээзи-биле алырга, 2018 чылдың январь 1-ден бөгүнге 133 дун чаштар төрүттүнген. Пособие алыр билдириишкинни амдыызында чүгле 11 ие бижээн. Үени ажыглап мону дыңнадыксадым, бир эвес 6 ай эрте бээр болза, ук төлевирни чүгле билдириишкин киирген хүнден эгелеп төлээр, ынчангаш далашканы дээре. Амыдырал аайы-биле чаа божаан иелер өпеялары дээш чеже-даа чай чок болза, үени база Тывага эвээш эвес акшаны – 10347 рубльди чидирбези-биле билдииришкинни дүрген киирер херек.
— Бир эвес январьда божааш, мартта билдириишкин киирер болза, январь биле февральдың төлевирин төлеп бербес бе?
Саида Сенгии, ТР-ниң Өг-бүле болгаш уруглар херектериниң талазы-биле агентилелдиң директору:
- Чок, санап бээр. Маңаа кичээнгейлиг болуру артык эвес, 6 ай эрте бээр болза, эрткен айларның төлевирин албас.
— Маңаа тус черлерде, суурларда, кожууннарда социал ажылдакчыларның ролю кол болгу дег? Чамдык авалар хоойлуларны чедир сайгарбас болгай?
Саида Сенгии, ТР-ниң Өг-бүле болгаш уруглар херектериниң талазы-биле агентилелдиң директору:
— Ийе шын, ынчангаш республиканың баштыңы Шолбан Кара-оолдуң даалгазы-биле чурттакчы чонга тайылбыр ажылын организастаан бис. Ук хоойлунуң чурумунуң дугайында поликлиникаларда, божудулга бажыңнарында, херээженнер кабинеттеринде тайылбырлап турар бис.
— Ие кижи уруг азырап олурары дээш ай санының пособиезинге немей 10000 рубльди база алыр бе?
Саида Сенгии, ТР-ниң Өг-бүле болгаш уруглар херектериниң талазы-биле агентилелдиң директору:
— Ие чаш уруг азырап олурары дээш, бирги чашка 4 муң ажыг рубль түңнүг ай санының пособиезин база алыр. Ийи пособиени кадыптарга, 15 муң хире рубль акша боор.
— Ие капиталын чугаалажыылыңар. Светлана Караевна, 2018 чылда өг-бүлениң ие капиталын ажыглаар чаа арга тургустунган. Ооң дугайында тайылбырлап бериңерем?
Светлана Кенден, РФ-тиң Пенсия фондузунуң Тывада салбырының удуртукчузу:
- Өг-бүле бүрүзү ийиги өпеязы төрүттүнгенде ие капиталынга сертификатты алыр, ооң хемчээли бо хүнде 453 муң рубль акша, бир дугаарында моон эгелеп алыыңар. Өг-бүле ол сертификатты алгаш, ай санының 10347 рубль түңнүг төлевирин алырынче кордап болур. 2018 чылда ийиги өпеязы төрүттүнген өг-бүлер ол төлевирже кордап болурун база катап демдеглейн. Үшкү, дөрткү-даа эвес, а ийиги өпеязы дээш. Амыдырап-чурттаарының хемчээли эвээш иелер азы өг-бүлелер ие капиталындан акша төлевирин алыр дугайында билдириишкинни киирер. Саида Хертековна демделегледи, регион бүрүзүнде ол хемчээл аңгы деп.
— Өг-бүле ол пособиени алырындан ойталап болур бе? Чижээ, ие капиталының ол акшазын бажың садып алырынга чарыыр дээн дижик?
Светлана Кенден, РФ-тиң Пенсия фондузунуң Тывада салбырының удуртукчузу:
— Ийе, ие капиталының акшазын кайнаар чарыырын өг-бүле боттары шилиир эргелиг. Чурттаар байдалын экижидеринче, уругнуң өөредилгезинче, иениң пенсиязының чыылдалыг кезээнче, инвалид уругларның адаптациязынче азы ай санының пособие акшазынче дээш. Чигзинчиг конторалардан дуза дилеп, оларның ачы-дузазы дээш хөй комиссиялар төлеп турбайн, «дириг» акшалары ие капиталындан хоойлу езугаар алыры - чаа чүүлдүң эки талазы бо. Бо таварылгада ие кижи уруглар акшазын ай санында оон алыр.
— 2019 чылда пособиениң хемчээли өскерлир бе?
Светлана Кенден, РФ-тиң Пенсия фондузунуң Тывада салбырының удуртукчузу:
— Ийе, 2018 чылдың ийиги кварталында доктааткан ажылдап шыдаар кижилерниң амыдырап-чурттаарының кудуку хемчээлинден 2019 чылда төлевирниң түңү хамааржыр.
— База бир айтырыг: чижээ, өг-бүле Тывага пособиезин ап тургаш, Бурятияже көже берген болза, төлевирлер ол-ла хемчээлге артып каар бе?
Светлана Кенден, РФ-тиң Пенсия фондузунуң Тывада салбырының удуртукчузу:
- Чок. РПФ-ниң салбыры Тывада төлевирни соксадыр. Ынчангаш өг-бүле чеде берген черинде Россияның Пенсия фондузунуң девискээр салбырынче баар ужурлуг. Пособиениң хемчээли ук регионда, бо таварылгада Бурятияда, амыдырап-чурттаарының кудуку хемчээлинден хамааржыр.
-— Ийиги уруунга пособие акшазын ие капиталындан алыр дугайында билдириишкинни авалар кайнаар киирерил?
Светлана Кенден, РФ-тиң Пенсия фондузунуң Тывада салбырының удуртукчузу:
— Пенсия фондузунче, хөй ажыл-чорудулгалыг төптерже (МФЦ) киирер, Интернет таварыштыр билдириишкин киирер сайтыны база ажылдап кылган бис.