Тываның Чазааның үш төлевилел офизи «Төлевилел Олимпизи» федералдыг конкурстуң финалынче кирген

 Россияның Чазааның чанында Аналитика төвү төлевилел ажыл-чорудулгазын мергежилдиг башкарарынга «Төлевилел Олимпизи» конкурсту дөрт дугаар чыл эрттирип турар. 

 Чагыг киирер, отчет материалдарын тургузар, төнчү тур база тиилекчилерни тодарадыр 4 чадада конкурс хувааттынган. Асессорлар шилилде тур үезинде 176 конкурс отчеттарын үнелээнин конкурстуң организаторлары демдеглээн. Ам асессорлар финалче киргеннерге боттары барып чедер.  

 Тыва Республиканың Чазаа конкурста бир дугаар киришкен, 3 төлевилел офизи дараазында номинацияларда:

  «Чедиишкинниг доозукчу» регион төлевилелин боттандырып турар төлевилел командазы «Чылдың тулган төлевилели – Комплекстиг төлевилелди удуртуру» номинацияда; Тыва Республиканың Информатизация болгаш харылзаа яамызының төлевилел офизи – «Төлевилелдерни удуртурда эптиг аргалар» номинацияда; Тыва Республиканың Экономика яамызының төлевилел офизи – «Инвестиция климадын экижидер төлевилел офистерин организастаары болгаш ооң ажыл-чорудулгазы» номинацияда финалче киргеннер.

  Асессорлар Тывага октябрьда кээр болгаш демдекти салыр.