Тываның Баштыңы "Мир" шахтага айыыл-халап-биле кажыыдалын илереткен

 Август 4-те Якутияда «Мир» шахтага айыыл-халап болуп, сес дагжы мөчээн. Тываның Баштыңы Шолбан Кара-оол Якутияның Баштыңы Егор Борисовка болгаш республиканың чурттакчы чонунга кажыыдалын илереткен. 

 «Халаптыг таварылга – «Мир» руда уургайынга дагжыларның мөчээни-биле холбаштыр Тываның хөй нациялыг чонунуң мурнундан болгаш бодумнуң өмүнээмден ханы кажыыдалды илередип тур бис. Шахтерлар боттарының белен эвес болгаш карак кызыл күш-ажылы-биле кижилерниң чаагай чоруунга, чурттуң экономиказының сайзыралынга үнелеп четпес үлүг-хууну киирип турарлар. Эрес-дидим дагжыларның дугайында сактыышкыннар Саха (Якутия) Республиканың тывыш адырының төөгүзүнге кезээде артар. Мөчээн улустуң төрел болгаш чоок кижилеринге ханы кажыыдалды илерtттивис. Аар чидиригни үлежип, силер-биле кады кажыыдап тур бис» - деп, Шолбан Кара-оол телеграммазында бижээн.  

Айыыл-халап болган соонда 151 дагжыдан 143 кижини камгалаан. Карьерниң кыдыглары буступ бадарының айыылы улуг болганы-биле, камгалал ажылдарын соксадырын Россияның ОБЯ-зы август 26-да чарлаан. Чер адаанда арткан шахтерларның ады бо: Алексей Власенко, Дмитрий Жуков, Виталий Куликов, Дмитрий Марьин, Глеб Миронцев, Валентин Мисник, Михаил Неустроев, Игорь Степанов. 

«АЛРОС»-туң Якутскда төлээ чериниң бажыңының чанында «Мир» уургайынга читкен дагжыларга тураскаал кылдыр кажыыдалдың ханазын тургусканын, Якутияның Баштыңының парлалга албаны дыңнаткан.

 Якутияның чурттакчы чону чечектерни салып, лааларны кыпсып, кажыыдалдың сактыышкынын аңаа кылып болур. Мирный хоорайга, республиканың Москва биле Санкт-Петербург хоорайларда доктаамал төлээ черлеринге дагжыларга сактыышкынның хемчеглери эртер.