Тывада "Школаже белеткениринге дузалаш!" деп республика чергелиг ачы-дуза акциязы эгелээн

 Чыл санында эртип турар, чаагай чаңчыл апарган «Школаже белеткениринге дузалаш!» деп акция амыдыралдың берге байдалынга таварышкан ада-иелерниң дыка хөй уругларынга школаже үезинде белеткенир арганы берип турар.  

 Уругга школаже шупту чүүлдери бар кылдыр белеткээри – чедимчелиг безин ада-иелерге ындыг-ла амыр эвес. А бир эвес уругнуң ада-иези чок ийикпе, азы авазы чааскаан азырап турар болза? Бо байдалда өөренир херекселдер садып алыры, чаа өөредилге чылының эгези - муңгаранчыг чүүл апаар. 

 Өөредилге чылының бирги хүнү өөреникчилерге езулуг байырлал болзун дээш, өөренир херекселдер, чаа эвес-даа болза, эки школачы хептер-биле дузалажып, Кызыл хоорайда Калинин, 1б адресте, Тыва Республиканың Өөредилге болгаш эртем яамызында 218 кабинетке, азы республиканың хоорайларында болгаш кожууннарда Өг-бүлеге болгаш уругларга социал деткимче төвүнге оларны эккеп болурун дыңнаттывыс.