Тываның Өөредилге болгаш эртем яамызы «Өг-бүле бүрүзүнге 1-ден эвээш эвес дээди эртемниг уруг» губернатор төлевилели-биле РФ-тиң дээди өөредилге черлеринче дужаап киргеннерниң дугайында илеткээн

 Школа болгаш ортумак тускай өөредилге черлериниң доозукчулары болур төлевилел киржикчилери 3978 кижиниң 2011-и дужаап алган. Төлевилел боттаныышкынче үш чылда 7931175 рубльди тускайлаан. Төлевилелдиң шупту 3589 киржикчизиниң 6,3 хуузунга азы 228 кижиге социал деткимчени көргүскен. 2014 чылда - 1294000 рубль; 2015 чылда – 3630975 рубль; 2016 чылда – 3006200 рубль акша түңүнге.

  Төлевилел киржикчилериниң дугайында медээлер баазазында 14262 кижи бар, оларның 4887-зи (62 хуузу) 1-ден 5 класстың, 5281 кижи (37 хуузу) 6-10 класстың өөреникчилери. 3 салгал чедир дээди эртемниг кижилери чок, хөй ажы-төлдүг болгаш эвээш орулгалыг өг-бүлелерден школа назы четпээн 3738 уруглар, оолдарны (26 хуузу) илереткен.

 «Өг-бүле бүрүзүнге 1-ден эвээш эвес дээди эртемниг уруг» губернатор төлевилелиниң боттаныышкыны-биле чурттуң дээди өөредилге черлеринче 2017 чылда 561 доозукчу дужаап кирип алган, оларның 97-зи техникум болгаш колледж соонда. Тывадан дашкаар дээди өөредилге черинче тускай сорулгалыг бюджет олуттарже 85, Тываның күрүне университединче 21 кижи дужаап кирген.

 Бо хүнде Россияның Дээди өөредилге черлеринде конкурстуг кол олуттар 100 хуу долган. Абитурентилерден билдириишкиннер хүлээп алыры доозулган, а август 8-те дээди өөредилге черлериниң медээлер самбыраларында база албан езузунуң сайтыларында дужаап кирип алганнарның дужаалдарын аскылапкан.  

 Бо хүннүң байдалы-биле алырга, ниити конкурсту эрткеш, Тываның күрүне университединче 17, Тывадан дашкаар дээди өөредилге черлеринче 29 кижи кирип алган. «Өг-бүле бүрүзүнге 1-ден эвээш эвес дээди эртемниг уруг» губернатор төлевилели-биле бо чылын дээди өөредилге черлеринче киргеннерниң хуузу – 27,1.