Тывага электроннуг чазак неделязы болуп эрткен

 Июль 12-14 хүннеринде Тывага июль айның эң-не улуг хемчээлдиг акцияларының бирээзи – электроннуг чазакка тураскааткан ажык эжиктер хүнү болуп эрткен. Ол 1400 хире кижини хаара туткан.

  Хемчегниң сорулгазы – херектиг чугула документ бижиктерни артык шүүдел чокка ап болур күрүне ачы-дуза порталын нептередир дээрзин акцияның организакчызы - Тываның Информатизация болгаш харылзаа яамызы дыңнаткан. 

 - Республиканың уруглар эмнелгезинде Ажык эжиктер хүнүнге чордум. Ооң мурнунда кара даң бажында тургаш, оочурлааш, талон алыр турган болза, ам «Мээң кадыкшылым» деп кезекте хуу кабинет таварыштыр эмчиже бижидип ап болурун тайылбырлап берди. Бөгүн уруумну оочурга бижидип алдым деп, Олча Монгуш чугаалаан. 

 Республиканың эмнелгелеринге – консультация-диагностика болгаш хоорай поликлиниказынга, уруглар эмнелгезинге, Кызылдың ХБАБ эргелелинге, Тываның Өөредилге яамызынга, чурттакчы чонну ажылга хаара тудар төптерниң девискээр килдистеринге дээш, өске-даа черлерге акциялар болуп эрткен. Барык шупту кожууннарның Ажылга хаара тудар төптеринге хөй хүлээлгелиг төптерниң ажылдакчыларын хаара тудуп, Күш-ажыл болгаш социал политика яамызы эң-не көвей чонну чыгган. Аңаа келген улустуң саны бүгү республиканың акциязынга киришкен кижилерниң 70 хуузу болуп турар. 

  Регионнуң Информатизация болгаш харылзаа яамызы 2017 чылдан эгелеп Тываның Чазааның төлевилел эргелеп-башкарылгазының төлевилел офизиниң «Күрүне ачы-дузалары чоок апарган» деп мурнады боттандырар төлевилелди ажылдадып эгелээнин сагындыраал.